Amerikalı siyasi elmlər mütəxəssisi, beynəlxalq münasibətlər sahəsində qlobal nüfuza sahib olan professor Cozef Nay 88 yaşında vəfat edib.

Modern.az-ın məlumatına görə, onun ölüm xəbəri Harvard Universiteti tərəfindən təsdiqlənib.

Nayın dəqiq ölüm səbəbi ictimaiyyətə açıqlanmasa da, yaxınları onun son illər sağlamlıq problemləri ilə mübarizə apardığını bildiriblər.

Cozef Nay müasir siyasi terminologiyaya "soft power" – yəni “yumşaq güc” anlayışını gətirməklə tanınır. Bu konsepsiya dövlətlərin yalnız hərbi və iqtisadi güclə deyil, həm də mədəniyyət, ideologiya və institutlarla qlobal təsir göstərmə potensialını izah edir. Nayın ideyaları ABŞ-ın xarici siyasətində və bir çox ölkənin diplomatik strategiyalarında dərin iz buraxıb.

Harvard Universitetinin Kennedi Məktəbində uzun illər dərs demiş Nay eyni zamanda ABŞ Müdafiə Nazirliyində yüksək vəzifələrdə çalışıb, müxtəlif prezidentlərin məsləhətçisi olub. Onun “Yumşaq güc”, “Gücün gələcəyi” kimi əsərləri dünya miqyasında oxunur, dərslik kimi tədris olunur.

Nay həmçinin qlobal güc balansı, ABŞ-Çin münasibətləri və beynəlxalq təhlükəsizlik məsələləri ilə bağlı analitik baxışları ilə tanınırdı. Onun intellektual irsi, xüsusilə informasiya əsrində güc anlayışının transformasiyasına dair fikirləri bu gün də aktual olaraq qalır.