İrəvan Rusiya hərbi bazasının Ermənistan ərazisindən çıxarılması məsələsini müzakirə etmir.
Modern.az-ın məlumatına görə, bunu Ermənistan parlamentinin spikeri Alen Simonyan jurnalistlərə açıqlamasında bildirib.
"Xeyr. Ermənistan Rusiya hərbi bazasının çıxarılması məsələsini müzakirə etmir", - o deyib.
Xatırladaq ki, Ermənistan parlamentinin deputatı Tiqran Abramyan Rusiya bazasının çıxarılmasının Bakı ilə İrəvan arasında sülhün bərqərar olması üçün ilkin şərtlərdən biri ola biləcəyini və iki ölkənin mövqelərinin razılaşdırıldığını iddia edib.
Qeyd edək ki, Ermənistanda yerləşən 102-ci Rusiya hərbi bazası 1995 -ci ildə yaradılıb və bu günə qədər fəaliyyət göstərir. İlkin olaraq Ermənistanla Rusiya arasında hərbi əməkdaşlıq haqqında saziş 25 il müddətinə bağlanıb. 2010-cu ildə Rusiya prezidenti Dmitri Medvedevin Ermənistana səfəri zamanı müqavilənin müddəti daha 49 il - 2044-cü ilə qədər uzadılıb.
