Dünya siyasətində liderlərin ailə həyatı bəzən şəxsi məsələ kimi qəbul olunsa da, onların valideyn olub-olmaması zaman-zaman ictimai və ideoloji müzakirələrə səbəb olur.  Liderlərin övladları onların dövlət idarəçiliyinə münasibəti və fədakarlıq dərəcəsi ilə də əlaqələndirilir.

Beynəlxalq mediada bu məsələyə müxtəlif bucaqlardan yanaşılır: bəziləri bunun şəxsi seçim olduğunu vurğulayır, digərləri isə bu liderlərin siyasətdəki motivasiyalarını və gələcəyə dair öhdəliklərini sorğulamağa çalışır.

Modern.az dünyada övladı olmayan liderləri araşdırıb.

Avropanın siyasi səhnəsində övladı olmayan liderlərin sayı az deyil. Onların sırasında ən tanınmışlardan biri Almaniyanın keçmiş kansleri Angela Merkeldir. Merkel 16 il ərzində Avropanın siyasi simasını formalaşdıran başlıca fiqurlardan biri olsa da, şəxsi həyatını daim kənarda tutub və övlad sahibi olmayıb. O, dəfələrlə siyasi fəaliyyətini şəxsi fədakarlıqla izah edib.

Merkelin siyasi varisi və bir müddət əvvəl vəzifədən gedən Almaniya kansleri Olaf Şolts da övlad sahibi deyil. Onun da ailə həyatı ictimaiyyətdə nadir hallarda müzakirə olunur və siyasi gündəliklə şəxsi həyat arasındakı sərhədi qorumağa çalışır.

Britaniyanın sabiq baş naziri Tereza Mey övladı olmamasının ona dərin şəxsi təsir etdiyini etiraf edib. O, bu barədə müsahibələrində açıq danışaraq, bunun həyatında iz buraxdığını desə də, peşəkar fəaliyyətinə təsir etmədiyini bildirib.

Rumıniyanın bir müddət əvvəl istefa verən sabiq prezidenti Klaus İohannis də övladı olmayan liderlər sırasındadır. Onun bu xüsusiyyəti ölkə mediasında zaman-zaman müzakirə olunsa da, əsas diqqət idarəçilik üslubuna yönəlib.

Bu tendensiya yalnız keçmiş liderlərlə məhdudlaşmır. Bu gün də dünyanın siyasi fiqurlarından bəziləri övlad sahibi deyil.

Niderlandın sabiq baş naziri və yeni seçilmiş NATO baş katibi Mark Rutte şəxsi həyatı barədə olduqca qapalıdır. Onun heç vaxt evlənməməsi və övladı olmaması ölkə daxilində müzakirə mövzusu olsa da, bu, onun uzunmüddətli siyasi karyerasına və nüfuzuna mane olmayıb.

Fransanın hazırkı prezidenti Emmanuel Makron də bioloji övladı olmayan liderlərdəndir. O, müəllimi və həyat yoldaşı Bricit Makronun əvvəlki evliliyindən olan övladlarına "atalıq" etsə də, özü ata olmayıb. Bu, Fransa cəmiyyətində bəzən satirik yanaşmalarla müşayiət olunub.

Hindistanın Baş naziri Narendra Modi siyasi həyatını şəxsi münasibətlərdən üstün tutan lider kimi tanınır. O, gənc yaşlarında evlənsə də, ailə həyatı rəsmi şəkildə davam etməyib və Modi heç vaxt ata olmayıb. Modi tez-tez Hindistan xalqını öz ailəsi kimi təqdim edir və “millətin atası” obrazını önə çıxarır.