Ermənistan hökuməti “Mülki müqavilə” fraksiyasından deputat Hayk Sarkisyanın təqdim etdiyi qanun layihəsini Müdafiə Nazirliyinin təklif etdiyi bir sıra düzəlişlərlə təsdiqləyib.

Modern.az xəbər verir ki, bu barədə Ermənistan KİV-nin məlumatında bildirilib.

İlkin olaraq Sarkisyan 24 aydan az müddətə məcburi hərbi xidmət imkanının nəzərdə tutulmasını təklif edib: qanun layihəsinə əsasən, 18 yaşına çatmış vətəndaşlar 15 milyon dram ödəyə və 6 ay müddətinə xidmət edə, yaxud 20 milyon dram ödəyib cəmi 1 ay xidmət edə biləcəklər.

O, həmçinin məcburi xidmət üçün maksimum yaş həddinin 27-dən 37-yə qaldırılmasını təklif edib.

Müdafiə Nazirliyi layihəyə baxıb və aşağıdakı dəyişiklikləri edib.

Yenidən işlənmiş layihəyə əsasən, 1 aylıq xidmət üçün (minimum tarif) 24 milyon dram, 4 aylıq xidmət üçün (yalnız təlim bölməsində) 18 milyon dram ödəmək lazım gələcək.

Məcburi xidmət üçün maksimum yaş həddinin 32 yaş müəyyən edilməsi təklif edilir.

Bundan başqa, “Müdafiə haqqında” qanuna 16 yaşa qədər Ermənistan vətəndaşlığından çıxmaq üçün 15 milyon dram, çağırış yaşından əvvəl və ya çağırış dövründə vətəndaşlıq almış əcnəbi vətəndaşlar üçün isə 12 ay xidmət müddəti və ya 2,5 milyon dram rüsum müəyyən ediləcək bənd daxil ediləcək.

Dəyişikliklər təşəbbüsün müəllifi ilə müzakirə edilib və Hayk Sarkisyan onların daxil edilməsinə razılıq verib. Qanun layihəsi yaxın vaxtlarda Milli Məclisin müzakirəsinə təqdim olunacaq.