“Atlas” Araşdırmalar Mərkəzinin rəhbəri, politoloq Elxan Şahinoğlu Azərbaycanın Ukrayna ilə diplomatik münasibətlərinə dair sosial şəbəkədə paylaşım edib.
Modern.az xəbər verir ki, politoloq mayın 25-də Azərbaycan Prezidenti İlham Əliyevlə Ukraynanın xarici işlər naziri Andrey Sibiqa arasında keçirilən görüşün önəmini xüsusi qeyd edib.
Elxan Şahinoğlu bildirib ki, Ukrayna Prezidenti Volodimir Zelenskinin salamlarını Prezident İlham Əliyevə çatdıran Sibiqa Azərbaycanın Ukraynanın ərazi bütövlüyünə verdiyi daimi və prinsipial dəstəyə görə təşəkkürünü ifadə edib. Politoloqun fikrincə, Ukrayna tərəfinin bu dəstəyi yüksək qiymətləndirməsi Azərbaycanın beynəlxalq nüfuzunun artmasından xəbər verir.
Elxan Şahinoğlu xatırladıb ki, Prezident İlham Əliyev ADA Universitetində keçirilən “Yeni dünya nizamına doğru” adlı beynəlxalq forumda çıxışı zamanı Azərbaycanın Ukraynanın ərazi bütövlüyünə və suverenliyinə olan dəstəyini açıq şəkildə ifadə edib. Prezidentin “Atəşkəs heç zaman müharibəni dayandırmır” fikri və sülhməramlıların təmas xəttində yerləşdirilməsinə dair ehtiyatlı yanaşması politoloqun diqqət çəkdiyi digər məqamlardandır.
Politoloq əlavə edib ki, İlham Əliyevin Rusiya-Ukrayna münaqişəsinə dair balanslı, lakin prinsipial mövqeyi beynəlxalq aləmdə də diqqətlə izlənir. Bu da Azərbaycanın həm Rusiya, həm də Ukrayna ilə münasibətlərini strateji şəkildə tənzimləmək bacarığını nümayiş etdirir.
Paylaşımda qeyd olunub ki, Ukrayna tərəfi Azərbaycanın göstərdiyi humanitar yardımları, xüsusilə İrpen şəhərində həyata keçirilən layihələri yüksək qiymətləndirir. Elxan Şahinoğlu bu kontekstdə Azərbaycan Prezidentinin humanitar dəstəyin davam etdiriləcəyinə dair açıqlamasını da mühüm mesaj kimi dəyərləndirib.
Sonda Elxan Şahinoğlu bildirib ki, iyul ayında Romada keçiriləcək Ukraynanın Bərpası Konfransında Azərbaycanın iştirakı Kiyev-Bakı münasibətlərində yeni səhifə aça bilər. Onun fikrincə, müharibədən sonrakı yenidənqurma prosesində Azərbaycanın iştirakı həm humanitar, həm də iqtisadi baxımdan önəmli rol oynaya bilər.
