Türkiyə Milli Kəşfiyyat Təşkilatının (MİT) rəhbəri İbrahim Kalın da Rusiya və Ukrayna arasında İstanbulda keçiriləcək danışıqlarda iştirak etməyi, Türkiyə Xarici İşlər Nazirliyinin rəhbəri Hakan Fidan isə iclasa moderatorluq etməyi planlaşdırır.

Modern.az xəbər verir ki, bu barədə TASS-a Türkiyə Xarici İşlər Nazirliyindəki mənbə bildirib.

"Türkiyə, Rusiya və Ukrayna nümayəndə heyətlərinin görüşü xarici işlər naziri Hakan Fidanın rəhbərliyi ilə saat 14:00-a (Bakı vaxtı ilə-red.) planlaşdırılıb. Fidanın açılış nitqi canlı yayımlanacaq. Görüşdə MİT-in direktoru İbrahim Kalının da iştirak edəcəyi gözlənilir", - mənbə bildirib.

Mənbə Rusiya Federasiyası və Ukrayna nümayəndə heyətlərindəki iştirakçıların siyahısını da təqdim edib. Məlumata görə, Prezidentin köməkçisi Vladimir Medinski, xarici işlər nazirinin müavini Mixail Qaluzin, müdafiə nazirinin müavini Aleksandr Fomin və Rusiya Federasiyası Silahlı Qüvvələri Baş Qərargahının Baş Kəşfiyyat İdarəsinin rəisi İqor Kostyukov təmsil edir.

Ukrayna nümayəndə heyətinə müdafiə naziri Rustem Umerov, xarici işlər nazirinin birinci müavini Sergey Kislytsya, Ukrayna Təhlükəsizlik Xidməti rəhbərinin müavini Oleksandr Poklad, Xarici Kəşfiyyat Xidməti rəhbərinin birinci müavini Oleq Luqovski daxildir.

Danışıqlar Boğaziçi sahilindəki Çırağan sarayında baş tutacaq. Mehmanxananın daxil olduğu bu tarixi binalar kompleksi Türkiyə hakimiyyəti tərəfindən rəsmi tədbirlərin təşkili üçün istifadə olunur.

Bundan əvvəlki danışıqlar mayın 16-da Çırağan yaxınlığındakı Dolmabaxça prezident ofisində baş tutub.