İngiltərədə yerləşən Vindzor qəsrində təhlükəsizlik insidenti baş verib.
Modern.az “Independent”ə istinadla xəbər verir ki, Kral ailəsinin üzvlərinin yaşadığı bu əraziyə icazəsiz daxil olan bir şəxs polis tərəfindən saxlanılıb. Saxlanılan şəxsin 30 yaşlarında olduğu və onun üzərində A sinif narkotik maddələr aşkarlandığı açıqlanıb. Şəxsin zaminə buraxıldığı və hadisə ilə bağlı araşdırmaların davam etdirildiyi bildirilib.
Qeyd edək ki, 2005-ci il tarixli “Ciddi Təşkilatlanmış Cinayətkarlıq və Polis Aktı”na əsasən, Kral ailəsinə məxsus ərazilər də daxil olmaqla, mühafizə olunan ərazilərə izinsiz daxil olmaq cinayət sayılır. Kral ailəsinin üzvləri, aprel-sentyabr ayları arasında xüsusilə də yay aylarında, Vindzor qəsrində daha çox vaxt keçirirlər.
