ABŞ Hərbi Hava Qüvvələrinin strateji “B-2 Spirit” bombardmançıları iyunun 22-nə keçən gecə İranın Nətənz, Fordo və İsfahan şəhərlərində yerləşən nüvə obyektlərinə kəskin hava zərbələri endirib.
Modern.az xəbər verir ki, Qərb mətbuatında əməliyyatla bağlı bir sıra detallar dərc edilib.
“The New York Times”ın məlumatına görə, əməliyyatdan öncə ABŞ ordusu İran radarlarını çaşdırmaq üçün xüsusi plan hazırlayıb. Belə ki, Missuri ştatındakı bazadan iki “B-2” qrupunun eyni vaxtda havaya qalxması qərara alınıb. Birinci qrup Quama doğru açıq uçuş edib, transponderlərini aktiv saxlayaraq kommersiya peykləri tərəfindən müşahidə edilib. Əsas hücum qüvvəsi olan yeddi “B-2” isə tam döyüş yükü ilə transponderləri söndürülmüş halda İrana istiqamətlənib.
Bu tip bombardmançılar “GBU-57” bunker dağıdan bombaları ilə təchiz olunmuş yeganə platformadır və İranın hava hücumundan müdafiə sistemləri tərəfindən aşkarlanması çox çətindir.
“Axios”un xəbərinə əsasən, ABŞ prezidenti Donald Tramp hücum qərarını iyunun 21-də Bedminsterdəki şəxsi qolf klubunda olarkən verib. Müdafiə naziri Pit Heqsetin əmri ilə “B-2” bombardmançıları artıq havaya qalxmışdı və “radio səssizlik nöqtəsi”nə yaxınlaşırdılar. Məhz bu mərhələdə Tramp son təsdiqini verib.
Zərbələrin başladığı anda ABŞ prezidenti artıq Vaşinqtona qayıtmışdı. Eyni zamanda, ABŞ-ın xüsusi nümayəndəsi Stiven Uitkoff İranın xarici işlər naziri Abbas Əraqçiyə hücumun yalnız nüvə proqramı ilə məhdudlaşdığını və ABŞ-ın hələ də diplomatik həll yolu axtardığını bildirib.
Xatırladaq ki, prezident Tramp hücumun nəticəsi olaraq İranın əsas zənginləşdirilmiş uran obyektlərinin “məhv edildiyini” qeyd edib.
