Rusiyanın Yekaterinburq vilayətində hüquq-mühafizə orqanları azərbaycanlı biznesmen Elvin Şükurovu saxlayıblar.
Modern.az xəbər verir ki, bu barədə Rusiya İctimai Palatasının üzvü Dmitri Çukreyev öz teleqram kanalında məlumat verib.
Məlumata görə, Elvin Şükurov Rusiya Cinayət Məcəlləsinin 171.1-ci maddəsinin 6-cı hissəsinin “a” və “b” bəndləri ilə -yəni əvvəlcədən əlbir olmuş şəxslər tərəfindən satış məqsədilə xüsusilə böyük miqdarda markalanmamış alkoqollu məhsulun istehsalı, saxlanması və daşınması maddəsi ilə ittiham olunur.
Çukreyev bildirib ki, Elvin Şükurovun işi Sverdlovsk vilayətinin Pervuralsk şəhərində gizli saxta içki istehsalı sexi ilə əlaqəlidir.
“Yekaterinburqda azərbaycanlı kökənli daha bir sahibkar - Elvin Şükurov saxlanılıb. İstintaqın təqdimatı əsasında o, barəsində həbs-qətimkan tədbiri seçilərək istintaq təcridxanasına göndərilib”, – deyə Dmitri Çukreyev bildirib.
"Kommetsant" nəşrinin məlumatına görə, sözügedən cinayət işində azərbaycanlılardan ibarət qrupun üzvləri kontrafakt içkilərin tədarükündə ittiham olunur.
