ABŞ prezidenti Donald Tramp sabiq vitse-prezident və Demokratlar Partiyasından prezidentliyə keçmiş namizəd Harrisin dövlət mühafizəsini ləğv edib. Bunla da Kamala Harris hökumətin himayəsindən məhrum olub.
Modern.az xəbər verir ki, CNN-in məlumatına görə, ABŞ Daxili Təhlükəsizlik Departamentinə tabe olan Məxfi Xidmət ABŞ-ın yüksək rütbəli məmurlarının təhlükəsizliyinin təmin edilməsinə cavabdehdir. Xidmətin vəzifələrinə prezidenti və vitse-prezidenti, keçmiş dövlət başçılarını, onların ailə üzvlərini və digər yüksək vəzifəli məmurları qorumaq daxildir.
Federal qanuna görə, keçmiş prezidentlərin ömürlük Məxfi Xidmət tərəfindən müdafiə olunmaq hüququ var, keçmiş vitse-prezidentlərin isə istefadan sonra cəmi altı ay vaxtı var. K.Harris üçün bu müddət iyulun 21-də başa çatıb, lakin Trampın sələfi ABŞ prezidenti Co Baydenin imzaladığı direktivlə onun müdafiəsi daha bir il uzadılıb. CNN-in məlumatına görə, Tramp məhz bu sərəncamı ləğv edib.
Beləliklə, 2025-ci il sentyabrın 1-dən keçmiş vitse-prezident Kamala Harris dövlət mühafizəsilə təmin olunmayacaq.
