İsmayıl Mərcanlı İmanzadə

Gəlin, birlikdə çıxaq Novruzun pişvazına, 

Alqış deyək baharın “işvəsinə-nazına”.

Keçəl qatsın səsini Kosanın avazına,

Gülsün nurlu çöhrəsi, gözü Azərbaycanın –

Barlı-bərəkətlidir yazı Azərbaycanın.

Dad versin süfrələrə noğul, nabat, paxlava,

Naxçıvanda, Şəkidə isinsin soyuq hava.            

Gəncədə, Lənkəranda göz oxşasın yurd-yuva, 

Soraq versin Qazaxdan közü Azərbaycanın –   

Barlı-bərəkətlidir yazı Azərbaycanın.

Söhbət açsın zəfərdən Dədə Qorqud boyları, 

Saysın nişanlı qızlar həftələri, ayları.

Könülləri oxşasın Azərbaycan toyları, 

Dinsin tarı, kamanı, sazı Azərbaycanın –

Barlı-bərəkətlidir yazı Azərbaycanın.

Qarabağın gör necə sevinci aşıb daşır,

Xar olan qarı düşmən İrəvanda ulaşır.  

Şuşaya, Zəngilana yaşıl libas yaraşır,

Qubadlıda nur saçır üzü Azərbaycanın –

Barlı-bərəkətlidir yazı Azərbaycanın.

Doyunca gedib gəzək Kəlbəcəri, Laçını

Ağdamda salamlayaq Qarqarçayı, Xaçını.   

Füzulidən didərgin saldıq ağrı-acını,

Cəbrayılda göyərdi izi Azərbaycanın –

Barlı-bərəkətlidir yazı Azərbaycanın.            

 Tonqal çataq, Murovun qarı-buzu ərisin,

Qubanı, Gədəbəyi şən nəğmələr bürüsün.

Tərtərdə yağıların qədəmləri çürüsün,

Polad kimi bərkisin “dizi” Azərbaycanın –

Barlı-bərəkətlidir yazı Azərbaycanın.

Muğanda al günəşin nuruna boyanaq biz,

Arazdan, Kürdən keçib Qubustana tutaq üz. 

Şamaxıda, Bakıda cuşə gəlsin qəlbimiz,

Heyran etsin dünyanı sözü Azərbaycanın –

Barlı-bərəkətlidir yazı Azərbaycanın.

                                                   
19.03.2021