Gecələr
Ulduzlar həmsöhbətim, sənsiz tərki-dünya oldum
Yeganə həmdəmimlə dərdimi böldüm gecələr
Telini çox oxşadım hər gün xəyalımda, gözəl
Səninçün ziyalardan çox çələng hördüm gecələr
Tənhalıq üzdü məni, qəmə qərq oldum, gülüm
Süzülən göz yaşımı xəlvəti sildim gecələr
Həsrət nə, məhəbbət nə, sevgi nədir? Duymadın, yox
Bu odun atəşinə tək yandım, bildin gecələr?
Bu qədər eşqi-əzab, möhnəti versən də mənə
Xəyallar aləmimdə açılmış güldün gecələr.
Gündüzlər kənar gəzdin, dözdüm, axı neyləməli?
Yuxuma gəlmədin heç, vallahi öldüm gecələr.
***
Olaram
Demə ki, ay əzizim, dəli sevdam ağlım alıb
Səni hər gördükcə mən ağlıma heyran olaram.
İnsaf et, ay gözəlim, yandırma çox, qədrimi bil,
Bilməsən tərki-dünya, bilmirəm hayan olaram.
Bu qədər zülm eylədin, dözdüm, sənə can söylədim
Çün səni görməyəndə mən də canımdan olaram.
Nə olar hay verəsən, sevgi haraylarıma sən
Hər ülkər baxışına əbədi ünvan olaram.
Sən də gər mənim kimi eşqə mübtəla olsan
Sənə həm loğman olar, həm də ki, dərman olaram.
Eybi yox, çək sınağa, yandır hələ şairi sən
Bir sənə eşqim üçün min yol imtahan olaram.
Bir zaman aşiq Abbas vida etsə bu dünyaya
Ölmərəm, onda da mən eşqimə qurban olaram.
***
Deyim?
Sənə ey sevgili yar, eşqimi pünhanmı deyim?
Canım alırsan bu qədər, indi sənə canmı deyim?
Gül, aləmə nur saç ki, isinsin həyatım
Bir şirin təbəssümə özümü qurbanmı deyim?
..Dün görsən də məni, əvvəlkitək kənar qaçdın
Qəlbimin həsrətinə sel deyim, tufanmı deyim?
Sevgidə vəfalıdır, min əzabı çəkər Abbas
Tək dözə bilmədiyim eşqdəki “böhrandı”, deyim?
İncitsən sevməyəcəm? Bu ağ yalandır, gözəlim
Duruban bu yaşımda özümə böhtanmı deyim?