Bu gün hər şey yaxşı olacaq
Üzüntülər dünəndə qalacaq
Günəş qiblədən doğacaq
Səadət bizə yar olacaq...
AZAL-ın sərnişin təyyarəsi qəzaya uğrayarkən stüardessa Hökümə Əliyevanın sərnişinlərə təsəllisi və özünün son daxili ümid yeri bu mahnının sözləri kimi oldu: "HƏR ŞEY YAXŞI OLACAQ!"
Ümid heç vaxt ölmür, insanla o dünyaya - əbədi məkana gedir! Ruhun şad, məkanın cənnət olsun- Hökümə xanım! Sənin həyatsevərliyin, arzuların, ümidlərin burada bitsə də, bir Vətən qızı, bir "göylər göyərçini"- səma mələyi kimi həmişə yaddaşlarda, qəlblərdə qalacaqsan!
Kəlbəcərin Susuzluq kəndində dünyaya göz açan dağlar qızı hansı arzu və ümidlərlə boy atıb, ərsəyə yetmiş, Bakı Dövlət Universitetinin Hüquq fakültəsini bitirib, magistratura və doktorantura təhsili almışdır. Heyif səndən Hökümə xanım, çox heyif!...
AZAL-da bu qədər hörmət - izzət qazanmışdın, 2016-cı ildə tərcüməçi, sonra stüardessa kimi fəaliyyətin necə təqdir olunurdu. Ən böyük arzun isə sevimli iş yerində ixtisasın üzrə hüquqşunas işləmək idi. Buna isə nail olmuşdun, qəzavü-qədər imkan vermədi ki, yeni təyinatının icrasına başlayasan...
Kaş görəydin, bu xalq, bu insanlar Səni necə sevgi-istəklə yad edirlər! II Fəxri xiyabanda dəfn olunacağın anın intizarını gözləyirlər sevənlərin! Allah rəhmət eləsin!
Səxavət Tağlar,
Əməkdar müəllim, Prezident təqaüdçüsü
