Erməni faşistlərinin Xocalı şəhərində törətdikləri dəhşətli soyqırımının 33-cü ildönümü tamam olur.
1992-ci il fevralın 25-dən 26-na keçən gecə Ermənistan silahlı qüvvələri beynəlxalq hüququn norma və prinsiplərini kobudcasına pozaraq keçmiş sovet ordusunun Xankəndidə yerləşən 366-cı alayının iştirakı ilə Xocalı şəhərinə hücum etdi və dinc əhaliyə misli görünməmiş qəddarlıqla divan tutdu.
Xocalı soyqırımı zamanı 106 qadın, 63 uşaq, 70 qoca olmaqla 613 şəxs məhz azərbaycanlı olduqlarına görə ağlasığmaz vəhşiliklə qətlə yetirildi, 487 dinc sakin ağır yaralandı, 1275 nəfər isə girov götürüldü. Şəhər yerlə-yeksan edildi. Həmin faciəvi gecə zamanı 487 nəfər Xocalı sakini ciddi şəkildə şikəst edildi və onlardan 76 nəfəri uşaqlardan ibarət idi. 8 ailə tamamilə məhv edildi, 25 uşaq hər iki valideynini və 130 uşaq isə bir valideynini itirdi. Qətlə yetirilən insanlardan 56 nəfəri xüsusi qəddarlıqla - diri-diri yandırılaraq, başının dərisi soyularaq, boynu vurularaq, gözləri çıxarılaraq, hamilə qadınların isə qarın boşluğuna süngü ilə vurularaq öldürüldü. 150 nəfərin taleyi isə bu günədək naməlum qalıb.
2020-ci ildə 44 gün sürən döyüşlər nəticəsində rəşadətli Azərbaycan Ordusu parlaq qələbə qazanaraq doğma torpaqlarımızı işğaldan azad etdi. 2023-cü ilin 19-20 sentyabrında həyata keçirilən antiterror əməliyyatları nəticəsində Xocalı da düşməndən təmizləndi. Bununla da Xocalının qisası alındı.
Bütün bunlarla yanaşı, Azərbaycan xalqı heç vaxt Xocalı faciəsini unutmayacaq. Bu yara qaysaqlanmış olsa belə...
Modern.az saytı mərhum Xalq artisti, keçmiş millət vəkili Mikayıl Mirzənin ifasında Qarabağdakı faciələrin qurbanlarına yazılan "Sizi qınamıram" şeirini təqdim edir. Mərhum Xalq şairi Zəlimxan Yaqubun yazdığı şeir bu mövzuda ən təsirli əsərlərdən biridir.
Heyif ki, əvəzolunmaz sənətkarlar Mikayıl Mirzə və Zəlimxan Yaqub Qarabağın, Xocalının düşməndən təmizləndiyi günləri görə bilmədilər.
A.Qorxmaz
