Xalq şairi Qabil
Hava necə olacaq
Laçında - Kəlbəcərdə?! -
Salma təzədən məni
Bu xəbərinlə dərdə.
Seyr et dərdli Vətənin
Sən abi-havasını.
Satılmış Qarabağın
Kim çəkir səfasını?!
Get, ey odu söndürüb
Küllə oynayanlarım.
Toyda-vayda pıqqapıq
Daşıb-qaynayanlarım!
Qoruduzmu havanı,
Qoruduzmu iqlimi?
Niyə azdırırsınız
Düşüncəmi-əqlimi.
Şelliyə, Gülablıya
Qırov düşəcək, ya qar?
Səlamət çıxacaqmı
Yaza bağçalar-bağlar?
Səhər iyirmi-otuz
Axşam on beş dərəcə.
Lap olsun qırx beş-əlli,
Göydən od yağsın gecə.
Bu gün, bu saat, bu dəm
Bunun sənə nə dəxli?
Əsarətdə inləyən
Çöl-çəmənə nə dəxli?
Bu hava mə’lumatın
Yox, tavakabab deyil.
Havakababdır qardaş!
Öz-özünü aldatmaq
Yaman əzabdı, qardaş!
Tutulub-açılacaq
Bu gün Şuşada hava.
Sənə nə var tutulub
Açılacaq, binəva?!
Ağ yağış çimdirəcək
Cəbrayıl çinarını,
Sabir Süleymanovun
O yetim məzarını,
O dustaq məzarını,
Dayan görüm, ey, dayan!
Mənə ayrı xəbər ver.
Zəngilan-Qubadlıdan.
Söyləmə ki, Ağdamda
Hava necə olacaq?
Söylə Ağdam uğrunda
Dava nə vaxt olacaq?
Dava necə olacaq?
Füzulinin adını
Daşıyan torpağı ver!
Hava sorağı vermə
Qələbə sorağı ver!
Get, haqq-hesabı çürüt
Satqın nəfərlərinlə.
Bəsdi, xalqı hərrədin
Hava xəbərlərinlə.
Yad əllərdəsə torpaq
İstiliyi isitməz,
Soyuqluğu soyutmaz.
Bu saat ancaq, ancaq
Qətiyyətdən ver soraq!
Ayrı söhbət, ayrı söz
Qəlbimizi ovutmaz
1996
