Tələbəlik illərinin yadda qalan hadisələrindən biri də tələbə dostlar və rəfiqələrin bir yerdə ali məktəb bufetlərində keçirdiyi anlardır. Tənəffüs zamanı, boş vaxtlarda kimi tək, kimi də bir neçə dostu ilə birgə yolunu bufetdən salmalı olur. Əvəllər tələbə olanlardan eşitmişəm ki, ali məktəblərin bufetlərində qiymətlər cibə münasib, xidmət də ki keyfiyyətli olub. Bəs görəsən indi necə, tələbələr acanda, susayanda cibinə uyğun qiymətlə ali məktəblərin bufetlərində yemək yeyə, çay içə bilirlərmi? Bufetlərdəki şərait və keyfiyyət onları qane edirmi? Bu suallara cavab tapmaq üçün bir neçə universitetin bufetlərindəki vəziyyətlə maraqlandıq.
Əvvəlcə yolumuzu Bakı Dövlət Universitetinin 2-ci korpusunun bufetindən saldıq. Bufetin kiçik olması üzündən içəridə tələbələrin sıxlığı yaranmışdı. Söhbətləşdiyimiz tələbələr dedilər ki, demək olar ki, hər gün belə basabas olur. Qiymətlərlə də maraqlandır. Vəziyyət belədir:
Dönər-1 manat
Hamburger-50 qəpik
Pizza-40 qəpik
“Peraşki”-10 qəpik
Smit-30 qəpik
Xaçapuri-50 qəpik
Adi su (0,5 l)-50 qəpik
Meyvə şirəsi-40 qəpik
1 fincan çay-10 qəpik
Kofe-30 qəpik
III kurs tələbəsi İnarə Orucova dedi ki, qiymətlər bahadır: “Tələbələrə güzəşt etmək əvəzinə qiyməti hər semestrdən- simestrə qaldırırlar. Burda təmizliyə də riayət olunmur. Məsələn, fincanı yumadan çay süzüb verirlər”.
Digər tələbə Fatma Nəcəfli: “Xidmət çox aşağı səviyyədədir. 10 dəqiqəlik tənəffüsdə ancaq növbə gözləyirik. Universitetdən kənarda qiymətlər çox ucuzdur. Buranın bufetinə qalsa, gərək ac qalasan. Çox bahaçılıqdır”.
Başqa bir tələbə Aytən Bayramova da narazılıq etdi: “Digər korpusların bufeti ilə müqayisədə burda yer çox balacadır. Çox vaxt oturmağa yer tapmırıq. Qiymətlərə gəldikdə isə heç razı deyiləm. Çünki burda hər şeyi 2 qat baha satırlar. Bir sözlə tələbələri soyurlar”.
Növbəti ünvanımız Azərbaycan Dillər Universitetinin hər iki korpusudakı bufetlər oldu. Əsas korpusun bufeti müasir standartlara cavab versə də, digərində hələ də problemlər qalmaqdadır.
Qiymətlər:
Toyuq qızartması-80 qəpik
“Peraşki”-20 qəpik
“Küftə”-50 qəpik
Ətli börək-30 qəpik
Bulkular-50 qəpik-1 manat arası
Kofe-30 qəpik
1 fincan çay- 20 qəpik
Əsas korpusda dərs keçən IV kurs tələbəsi, Türkiyə vətəndaşı Tinan İnanın sözlərinə görə, bufet həmişə təmiz olur: “İşçilərin bizimlə münasibəti yaxşıdır. Bufeti təmiz və səliqəli saxlayırlar. Qiymətlər də normaldır”.
Amma ondan fərqli olaraq digər korpusun tələbələri narazılıq etdilər. II kurs tələbəsi Aynur Hüseyinova: “Qiymətlərdə endirim olsa təbii ki, yaxşı olar”.
Tələbə Könül Mehdiyeva: “Bəzən stolların üstü təmiz olmur. Ancaq ümumi götürəndə pis deyil. Bəzi yeməkləri ucuzlaşdırsalar, yaxşı olar”.
İqtisad Universitetinin tələbələri bu ali məktəbin bufetindəki qiymətdən narazıdırlar.
Qiymətlərlə siz də tanış olun:
Kolbasa-çörək-40 qəpik
Dönər-60 qəpik
Adi su (0,5 l)-40 qəpik
Salatlar-1manat 40 qəpik
III kurs tələbəsi Arzu Əzimova: “Qiymətlər bizi 30% təmin edir. Xidmət isə ürəkaçan deyil”.
Tələbə Yusif Cabbarlı: “Qiymətlər cibimə uyğun deyil, ona görə də yeməyi məcbur olub başqa yerdən alıram”.
Tibb Universitetinin bufeti isə geniş olsa da, təmizliyə riayət edilmir. Bunu tələbələr belə dedilər.
Qiymətlər:
Dönər-1 manat 20 qəpik
Şokalad-50 qəpik
“Peraşki”-20 qəpik
Bulkular-30-80 qəpik
Kofe-30 qəpik
1 fincan çay-20 qəpik
Meyvə şirəsi-50 qəpik.
III kurs tələbəsi Turan Əhmədova bufetin problemlərinin çox olduğunu deyir: “Burda gigiyenik qaydalara əməl edilmir. Qiymətlər isə çox bahadır. Ümumiyyətlə bufetin problemi çoxdur”.
Tələbə Camal Həsənli: “Bufetimiz normal standartlara cavab vermir. Çeşidli yeməklər yoxdur, olan yeməklər isə bahadır. Təmizliyi də yaxı gözləmirlər”.
Odlar Yurdu Universitetinin bufeti isə təhsil müəssisəsinin həyətində yerləşir. Bu da tələbələrin dərsə gecikmələrinə səbəb olur.
Qiymətlər:
Dönər-1manat 20 qəpik
“Peraşki”-20 qəpik
Bulka-20-50 qəpik
Çay-20 qəpik
Kofe-40 qəpik
Meyvə şirəsi-40 qəpik
Kola (0,5 l)-50 qəpik
I kurs tələbəsi Fuad İsmayılzadə bufetdə təmizliyin yaxşı olduğunu dedi: “Amma qiymətlərin baha olmasından narazıyam”.
Tələbə Fərid Şahbazlı isə xidmətin aşağı səviyyədə olduğunu söylədi: “İşçilərin az olması xidmətini səviyyəsinə mənfi təsir göstərir. Buna görə də uşaqlar dərsə gecikir. Qiymətlər küçə ilə müqayisə bahadır”.
 |
 |
 |
 |
 |
 |
Günay MUSAYEVA
