Bakıda keçmiş arvadını qətlə yetirməkdə təqsirləndirilən Arzuman Fazilova hökm oxunub. O, 18 il müddətinə azadlıqdan məhrum edilib.
Modern.az xəbər verir ki, bu barədə hökm Bakı Ağır Cinayətlər Məhkəməsinin hakimi Zeynal Ağayevin sədrliyi ilə keçirilən prosesdə elan edilib.
Dövlət ittihamçısı A.Fazilovun 19 il 6 ay müddətinə azadlıqdan məhrum edilməsini istəmişdi.
Qeyd edək ki, hadisə ötən ilin iyulunda paytaxtın Xəzər rayonunda baş verib. Belə ki, Binə qəsəbəsi ərazisində yerləşən fərdi yaşayış evində 1978-ci il təvəllüdlü A.Fazilov şəxsi münasibətlər zəminində aralarında yaranmış mübahisə zamanı bıçaqla çoxsaylı xəsarətlər yetirməklə 1982-ci il təvəllüdlü Vüsalə Əliyevanı öldürüb.
Onun barəsində Cinayət Məcəlləsinin 120.2.4-cü (qəsdən adam öldürmə, xüsusi amansızlıqla və ya ümumi təhlükəli üsulla adam öldürmə) maddəsi ilə cinayət işi başlanıb.
