Polşada səfərdə olan Diasporla İş üzrə Dövlət Komitəsi əməkdaşlarının “Heydər Əliyev İli” çərçivəsində Krakov şəhərində yaşayan Azərbaycan icması ilə görüşü keçirilib.
Komitədən Modern.az-a bildirilib ki, görüşdə Azərbaycanın Polşadakı səfirliyinin əməkdaşları, “Xarı Bülbül” Dünya Azərbaycanlıları Assosiasiyasının fəalları, bu şəhərdə təhsil alan azərbaycanlı tələbələr iştirak ediblər.
Öncə Azərbaycanın Dövlət Himni səsləndirilib, Ümummilli Lider Heydər Əliyevin, ölkəmizin müstəqilliyi və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Komitənin fəaliyyət istiqamətlərini, Azərbaycan evləri, həftəsonu məktəblərlə bağlı həyata keçirdiyi layihələri əhatə edən təqdimat keçirilib. “Heydər Əliyev İli” çərçivəsində Diaspor Gənclərinin IV Yay Düşərgəsinin Naxçıvanda təşkil ediləcəyinə, dünyanın müxtəlif ölkələrində keçirilən tədbirlərə diqqət cəlb edilib. Qarşıda duran vəzifə və hədəflərdən danışılıb.
Görüş xalqımızın Ümummilli Lideri Heydər Əliyevin həyat və fəaliyyətini əks etdirən sənədli filmin nümayişi ilə davam etdirilib.
Sonra “Xarı Bülbül” Dünya Azərbaycanlıları Assosiasiyasının rəhbəri Muxtar Şeyxzamanlı təşkilatın fəaliyyəti barədə hesabatla çıxış edib.
Görüş Polşada yaşayan azərbaycanlıların durumu barədə fikir mübadiləsinin aparılması ilə davam edib. Soydaşlarımız Krakovda Azərbaycan Evinin açılması və digər təkliflərlə çıxış ediblər.
Tədbir sualların cavablandırılması ilə başa çatıb.
