2020-ci ilin sentyabrına kimi keçmiş separatçı rejimin dövründə “Xankəndinin meri” postunu tutmuş David Sarkisyan 20 sutkalığa həbs edilib.
Modern.az xəbər verir ki, bu barədə onun vəkil Ruben Melikyan sosial şəbəkələrdə məlumat yayıb.
Bundan əvvəl təhlükəsizlik qüvvələri Sarkisyanın evində axtarış aparıb. O və daha 3 nəfər saxlanılaraq dələduzluqda və 4 avtomobildən oğurluqda ittiham olunub. İstintaq davam edir.
Xatırladaq ki, mayın 23-də keçmiş separatçı rejimin dövründə Qarabağdakı “Əsgəran şəhərinin meri” işləmiş Hayk Şamiryanın İrəvanda saxlanıldığı barədə məlumat yayılmışdı. Müstəntiqlər Şamiryanın mənzilində axtarış aparıb, sonra onu asaxlayıblar.
Mayın 24-də Şamiryan barəsində ev dustaqlığı qətimkan tədbiri seçilib.
Mayın 25-də isə keçmiş separatçı rejimin dövründə “Xocavənd şəhərinin meri” işləmiş Mişa Qyurjyanın da saxlanıldığı xəbəri yayılıb. İstintaq Komitəsi bəyan edib ki, o, külli miqdarda əmlakı mənimsəməkdə şübhəli bilinir.
