Azərbaycanın İrandakı səfirliyinə terror hücumunu 2-ci ili tamam olur.
Modern.az-ın məlumatına görə, 27 yanvar 2023-cü ildə, yerli vaxt ilə səhər saat 08:00 radələrində Azərbaycan Respublikasının İran İslam Respublikasının paytaxtı Tehran şəhərində yerləşən səfirliyinə silahlı hücum. Hücum edən şəxs, İran vətəndaşı Yasin Hüseynzadə "Kalaşnikov" markalı avtomat silahla mühafizə postunu yarararaq, səfirlik əməkdaşlarına atəş açıb. Bu zaman səfirlik əməkdaşları onu zərərsizləşdirməyə cəhd göstəriblər. Basqın nəticəsində diplomatik nümayəndəliyin mühafizə xidmətinin rəhbəri Orxan Əsgərov həlak olub. Hücumun dəf edilməsi zamanı iki mühafizəçi yaralanıb.Onlardan biri, terrorçunu zərərsizləşdirməyə nail olan Vasif Tağıyev çiynindən və çənəsindən güllə yaraları alıb, əməliyyat olunub. Digər yaralanan şəxs də əməliyyat olunub və bədənindən güllə çıxarılıb.
Orxan Əsgərov 30 yanvarda Bakıdakı İkinci Fəxri Xiyabanda dəfn edilib.
Yasin Hüseynzadə İran hüquq-mühafizə orqanları tərəfindən saxlanılıb və istintaqa cəlb olunub. Hücum aktı ilə bağlı Azərbaycan Dövlət Təhlükəsizliyi Xidmətində cinayət işi başladılıb. Azərbaycan Prezidenti İlham Əliyev hücumu qınayan bəyanat verib. Azərbaycan tərəfi məsuliyyətin İranda olduğunu vurğulayıb və hücumu "terror aktı" kimi qiymətləndirib. Azərbaycan Xarici İşlər Nazirliyi hadisədən 2ç gün sonra, yanvarın 30-da səfirliyin əməkdaşlarını Tehrandan evakuasiya edib və diplomatik korpusun fəaliyyəti dayandırılıb.
İran hüquq-mühafizə orqanlarını hücumun şəxsi zəmində törədildiyini iddia edib.
BMT baş katibi Antoniu Quterreş, Avropa İttifaqı, NATO, GUAM, 60-dan çox ölkənin dövlət başçısı, xarici işlər nazirləri və səfirləri hadisəni terror aktı kimi pisləyib.
Səfirliyə hücumu edən Yasin Hüseynzadə İran vətəndaşıdır, Urmiyada yaşayıb. O, Bakıdan olan bir qadınla evlənib və cütlüyün iki övladı olub. Hüseynzadənin sözlərinə görə, səfirlik binasına girəndə "Colt" və "Kalaşnikov" markalı odlu silahları üzərində daşıyırdı.
Yasin Hüseynzadə ilkin istintaqda 2022-ci ilin aprel ayında həyat yoldaşının səfirliyə getdiyini və evə qayıtmadığını iddia edib. O, səfirliyə dəfələrlə səfər etdiyi zaman oradan heç bir cavab almadığını və həyat yoldaşının səfirlikdə olduğunu, onun görüşmək istəmədiyini düşündüyünü bildirib.
Azərbaycan tərəfi bu iddiaları əsassız sayıb. Əksər ekspertlər İrandakı Azərbaycan səfirliyinə hücumu həmin dövrdə iki ölkə arasında baş verən diplomatik qarşıdurmanın məntiqi nəticəsi hesab ediblər.
İran Ədliyyə Nazirliyinin saytında verilən məlumata görə, cinayətkar barədə edam hökmü çıxarılıb. İranın Ali Məhkəməsi bu günlərdə səfirliyə terror hücumu etmiş Yasin Hüseynzadə barəsində çıxarılan edam hökmünü təsdiqləyib. Hökm icra üçün Tehran məhkəməsinə göndərilib.
Azərbaycan ilə İran arasında aparılmış danışıqlar nəticəsində 2024-cü il iyulun 15-dən etibarən Azərbaycanın İrandakı səfirliyi yeni ünvanda fəaliyyətini bərpa edib. Səfir və səfirliyin heyəti İrana geri dönüb.
Bu barədə Azərbaycan Xarici İşlər Nazirliyi məlumat yayıb.
A.Qorxmaz
