Bakı şəhəri Nərimanov Rayon Məhkəməsi aliment borcunu ödəməkdən qərəzli şəkildə yayınan şəxsə hökm oxuyub. Məhkəmənin qərarına əsasən, təqsirləndirilən şəxs Azərbaycan Respublikası Cinayət Məcəlləsinin 306.1-ci maddəsi ilə təqsirli bilinərək, 1 il 3 ay müddətinə azadlıqdan məhrum edilib.
Modern.az-ın məlumatına görə, 1983-cü il təvəllüdlü təqsirləndirilən şəxs iki dəfə evli olub və hər ikisindən boşanıb. O, məhkəmə qərarı ilə keçmiş həyat yoldaşlarına hər ay müəyyən edilmiş məbləğdə aliment ödəməli idi. Balakən Rayon Məhkəməsinin 2012-ci ildə çıxardığı qətnaməyə əsasən, o, yetkinlik yaşına çatana qədər birinci uşağı üçün ayda 60 manat, Nərimanov Rayon Məhkəməsinin 2023-cü il tarixli qərarı ilə isə ikinci uşağı üçün hər ay 220 manat aliment ödəməli olub.
Lakin təqsirləndirilən şəxs uzun müddət aliment ödəməkdən yayınaraq, ümumilikdə 11 900 manat borc toplayıb. O, dəfələrlə məhkəmə və icra orqanları tərəfindən xəbərdar edilib və inzibati məsuliyyətə cəlb olunub. 2017, 2019 və 2024-cü illərdə ona müxtəlif müddətlərdə inzibati həbs cəzası verilsə də, borcunu ödəməkdən boyun qaçırıb.
Son olaraq, 2025-ci ilin fevral ayında hüquq-mühafizə orqanları tərəfindən saxlanılan təqsirləndirilən şəxs məhkəmə qarşısına çıxarılıb. Hakim onun qərəzli şəkildə məhkəmə qərarlarını icra etmədiyini sübut olunmuş hesab edərək, azadlıqdan məhrumetmə cəzası təyin edib.
Qərara əsasən, cəzanın icrası 7 fevral 2025-ci ildən hesablanacaq və o, cəzasını ümumi rejimli cəzaçəkmə müəssisəsində çəkəcək. Bundan əlavə, təqsirləndirilən şəxsin müdafiəsi üçün dövlət hesabına ödənilmiş 180 manat vəsait vəkil bürosuna köçürüləcək.
Hökmdən 20 gün ərzində apellyasiya şikayəti vermək hüququ təmin edilib.
Yuxarıda qeyd etdiyimiz kimi, aliment ödəməkdən yayındığına görə azadlıqdan məhrumetmə cəzasına məhkum edilən İmran Əliyev (ad-soyad şərtidir-red.) iki dəfə evlənib və hər iki həyat yoldaşından boşanıb. Hər iki evlilikdən onun bir uşağı dünyaya gəlib.
Birinci uşaq 2005-ci ildə anadan olub və onun anası Hüseynova (Vəliyeva) Silduzə Hacı qızıdır (ad-soyad şətdidir-red.)
İkinci uşaq 2011-ci ildə anadan olub və onun anası Abdulova (Vəliyeva) Leyla Şamil qızıdır (ad-soyad şətdidir-red.)
Beləliklə, apellyasiya şikayəti təmin olunmasa, aliment borcunu ödəməyən İmran Əliyev qarşıdakı 1 il 3 ayı həbsxana divarları arasında keçirməli olacaq.
