06.03.2025-cü il tarixində saat 02:10 radələrində Lənkəran rayonu Girdəni kəndində fərdi yaşayış evində baş vermiş yanğın nəticəsində 2 nəfər (kişi cinsli) bədənin aşağı və yuxarı ətraflarının, üzün, belin I və II dərəcəli yanığı, sol əlin 1-ci dərəcəli yanığı diaqnozları ilə Lənkəran Rayon Mərkəzi Xəstəxanasının Təcili yardım şöbəsinə hospitalizasiya olunub.
Bu barədə Modern.az-a TƏBİB-dən bildirilib.
Zərərçəkənlərə zəruri ilkin tibbi yardım göstərilib. Xəsarət alanlardan biri vəziyyətinə uyğun olaraq Reanimasiya şöbəsinə yerləşdirilib. Digər şəxsin vəziyyəti qənaətbəxş olduğundan ambulator müalicə üçün evə buraxılıb.
***
09:16
Lənkəran rayonunun Girdəni kəndində fərdi yaşayış evində yanğın hadisəsi baş verib.
Modern.az xəbər verir ki, yanğın hadisəsi 1961-ci il təvəllüdlü Zakir Murtuza oğlu Əliyevə məxsus birmərtəbəli yaşayış evində qeydə alınıb.
Yanğın zamanı ev sahibi Zakir Əliyev və oğlu Murad Əliyev xəsarət alıb. Xəsarət alan 64 yaşlı Z.Əliyevin vəziyyəti ağır olduğundan reanimasiya şöbəsinə yerləşdirilib.
Yanğının söndürülməsi üçün Fövqəladə Hallar Nazirliyinin Lənkəran yanğından mühafizə hissəsinin avtomobilləri və canlı qüvvəsi hadisə yerinə cəlb olunub. Yanğınsöndürənlər tərəfindən alovun qarşısı alınıb.
Faktla bağlı araşdırma aparılır.
