Bakı ilə İrəvan arasında sülh sazişi layihəsinin tam razılaşdırılması ilə bağlı məlumat yayılandan dərhal sonra Ermənistan şərti sərhəddə ard-arda təxribatlar törədib. Son günlərdə Azərbaycan Ordusunun sərhəd mövqelərini intensiv atəşə tutuması rəsmi İrəvanın ikili oyun siyasətinin növbəti təzahürüdür.
Ermənistanın Baş naziri Nikol Paşinyan beynəlxalq ictimaiyyətə sülh tərəfdarı kimi görünməyə çalışsa da, faktiki olaraq atəşkəs pozuntularının baş verdiyi bir şəraitdə bu ritorikanın əksini müşahidə edirik. Bu, Ermənistanın siyasi strategiyasının bir hissəsidir: bir tərəfdən sülhdən danışmaq, digər tərəfdən isə qeyri-sabitliyi artırmaq. Sözügedən taktika Ermənistanın əvvəlki rəhbərləri tərəfindən dəfələrlə tətbiq olunub və bu gün də davam edir.
Hərbçilərimizə qarşı müxtəlif manipulyasiya cəhdlərinə əl atması ciddi suallar doğurur. Belə ki, ötən gün Ermənistan silahlı qüvvələrinin nümayəndələri sərhəd bölgəsində Azərbaycan hərbçiləri ilə ünsiyyət qurmağa çalışıb, onları təhqiramiz ifadələrlə təxribata çəkmək istəyib, hətta bəzi hallarda yüngül və istehzalı hərəkətlər edərək qarşı tərəfi emosional reaksiya verməyə təhrik ediblər. Lakin Azərbaycan hərbçiləri yüksək peşəkarlıq nümayiş etdirərək bu cür manipulyasiyalara əhəmiyyət verməyib və düşmənin qeyri-sağlam psixoloji davranışlarına uymayıb. Bu hadisələr Ermənistan ordusundakı real vəziyyəti gün üzünə çıxarır.
Ermənistan ordusunda özbaşınalıq
Ermənistan ordusunda nizam-intizamın zəif olması uzun illərdir müzakirə olunan mövzulardan biridir. Xüsusilə son illərdə bu problem daha da dərinləşib, korrupsiya geniş yayılıb. Silahlı qüvvələrdəki yüksək vəzifəli şəxslər arasında rüşvətxorluq adi hala çevrilib. Məhz bu korrupsiya halları nəticəsində hərbi xidmətə yararsız şəxslərin orduya qəbul edilməsi, silah və sursatın qeyri-qanuni yollarla satılması kimi hallar mətbuatda ən çox müzakirə olunan mövzudur.
Ermənistan mətbuatında və beynəlxalq təşkilatların hesabatlarında dəfələrlə ordu daxilində intihar hallarının artdığı qeyd olunub. Erməni zabitlərin əsgərlərə qarşı qeyri-insani rəftarı, zorakılıq və qeyri-qanuni cəzalandırma metodları ciddi problemlərə səbəb olur. Bu hallar orduda mənəvi psixoloji mühiti korlayır və şəxsi heyətin döyüş ruhuna mənfi təsir göstərir. Nizam-intizamın zəif olmasının başqa bir göstəricisi Ermənistan ordusunun şəxsi heyətinin hazırlıq səviyyəsinin aşağı olmasıdır. Döyüş hazırlığı və hərbi strategiya üzrə zəif təlimlər, komanda strukturunda koordinasiyanın olmaması və zabitlərin şəxsi heyət üzərində nəzarətini itirməsi, Ermənistan ordusunun qeyri-effektiv fəaliyyət göstərməsinə səbəb olur.
Planlı təxribat və psixoloji müharibə
Nizam-intizam problemi ilə yanaşı, bu cür yüngül xarakterləri təxribat cəhdlərinin Ermənistan hərbi-siyasi rəhbərliyinin xüsusi strategiyası olduğu ehtimalı da var. Bu, əsasən psixoloji müharibə və informasiya manipulyasiyasına əsaslanır. Ermənistan tərəfi sərhəd bölgəsində xidmət aparan Azərbaycan hərbçilərinə qarşı yüngül ifadələr və jestlərlə psixoloji təsir göstərməyə çalışır. Məqsəd Azərbaycan Ordusunun şəxsi heyətində psixoloji narahatlıq yaratmaq, onları emosional reaksiya verməyə vadar etmək və nəticədə regionda yeni gərginlik yaratmaqdır. Ancaq Azərbaycan ordusu yüksək peşəkarlıq nümayiş etdirir və bu təxribatlara uymur.
Təxribatların əsas məqsədlərindən biri də Azərbaycanla Ermənistan arasında sülh prosesinə mane olmaqdır. İrəvan təxribatlarla bu prosesi ləngitmək və pozmaq istəyir. Bu, keçmişdə dəfələrlə tətbiq olunan siyasi manipulyasiya üsuludur. 30 illik işğal dövründə də Ermənistan eyni taktikanı istifadə edirdi: sülh danışıqlarına razılıq verir, eyni zamanda atəşkəsi pozaraq Azərbaycanı təxribatlara cavab verməyə məcbur edirdi.
Qəsdən törədilən təxibatlarla Ermənistan beynəlxalq ictimaiyyətin diqqətini öz üzərinə çəkməyə çalışır. Xüsusilə Fransa və bəzi Qərb dairələrinin Ermənistana simpatiya göstərdiyini nəzərə alsaq, bu strategiya İrəvan üçün siyasi dividentlər qazandıra bilər.
Nəticə etibarilə, Ermənistanın bu cür addımları bölgədə sabitliyi pozur və sülh prosesinə ciddi maneələr yaradır. Əgər Ermənistan həqiqətən də sülh istəyirsə, təxribatlara son qoymalı və Azərbaycanla qarşılıqlı etimad qurmağa çalışmalıdır. Azərbaycanın strateji yanaşması isə təmkinlidir və beynəlxalq hüquqa əsaslanır.
Modern Təhlil və Araşdırma Qrupu
