"20 mart - 3 aprel tarixlərində uşaq sığınacağına 4-ü oğlan, 9-u qız olmaqla 13 uşaq qəbul edilib". 

Bu barədə Modern.az-a Azərbaycan Uşaqlar Birliyinin rəhbəri Kəmalə Ağazadə bildirib.

Onun sözlərinə görə, sığınacağa yerləşdirilən qızların yaş həddi 14-15-dir.

K.Ağazadə deyib ki, uşaqlardan cəmi 3 nəfəri valideynləri tərəfindən müvəqqəti olaraq sığınacağa verilib.

"Onların anaları da zorakılıq qurbanıdır, işləmək istədikləri üçün uşaqlarını müvəqqəti olaraq sığınacağımıza gətirdilər. Biz də öz tərəfimizdən bildirmişik ki, onlar bizim kontingentimizə daxil deyil. Biz hüquq-mühafizə orqanlarının iştirakı ilə zorakılıq qurbanlarını qəbul edirik. Bunlar isə valideynin qısa müddətli olaraq uşaqlarını yerləşdirmək istəməsi ilə bağlı müraciətlərdir".

K.Ağazadə qeyd edib ki, digər uşaqlar hüquq-mühafizə orqanlarının, icra hakimiyyətlərinin müvafiq  komissiyalarının, eyni zamanda Sosial Xidmətlər Agentliyinin əməkdaşlarının iştirakı ilə yerləşdirilib:

“Onların hər biri sosial təhlükəli vəziyyətdə olublar. Buraya erkən nikaha məcburetmədən başlayaraq, təhsildən yayınma, xoşagəlməz halların içərisində olma, xoşagəlməz situasiyalara düşmə, baxımsız vəziyyətdə qalma halları daxildir. Məsələn, 2 gün əvvəl gətirilən bacı-qardaş var idi ki, ana alkoqolik, içki düşkünü idi və ailə bərbad vəziyyətdə yaşayırdı. Uşaqlar ailədən alınıb və indi iş aparılır. O uşaqların həmin ananın yanında təhlükələrlə üzləşmə ehtimalının yüksək olması məsələsi var. Bura potensial insan alveri qurbanı olmaqdan başlayaraq, cinsi zorakılığa məcburetmə, təhriketmə, seksual hərəkətə məcburetmə kimi cinayətlər də daxil ola bilər. Son 2 həftə ərzində daxil olan uşaqların 4-5 nəfəri Bakının müxtəlif rayonlarına aiddir. Digərləri isə regionlarda yaşayan uşaqlardır”.

“Müəssisəmiz 20 nəfərlikdir. Amma 44 uşaq qeydiyyatdadır. Onların 16 nəfəri sanatoriyadadır, qalanları sığınacaqdadır. Bu aralarda virus yayıldı, uşaqlarımız arasında xəstəxanada olan, müalicə alanlar da var”-K.Ağazadə əlavə edib.