Azərbaycan xarici siyasəti və diplomatiyası dinamik mərhələyə qədəm qoyub. Əvvəllər daha çox müdafiə mövqeyində çıxış edən və regionda baş verən proseslərə reaktiv yanaşan Bakı bu gün özünü daha təşəbbüskar və çevik diplomatik aktor kimi təqdim edir. İstər Yaxın Şərqdə, istərsə də Avropada qurulan əlaqələr diplomatiyamızın taktikadan strategiyaya doğru keçid etdiyini göstərir.
Bu konteksdə Azərbaycan Prezidenti İlham Əliyevin Albaniyada Avropa Siyasi Birliyinin iclasında, Budapeştdə Türk Dövlətləri Təşkilatının zirvə toplantısında iştirakı mühüm simvolik və siyasi anlam daşıyır.
Bakı türk dünyasında təkcə mədəni kimliklə kifayətlənmək istəmir, iqtisadi, hərbi və texnoloji əməkdaşlıqlarla bu birliyin real gücə çevrilməsinə töhfə vermək niyyətindədir. Azərbaycanın təşəbbüsü ilə baş tutan layihələr – Zəngəzur dəhlizi, Orta Dəhliz və Türk İnvestisiya Fondu kimi mexanizmlər bu yanaşmanın təzahürüdür.
İlin əvvəlindən bəri Azərbaycan Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyevin diplomatik səfərləri Azərbaycan xarici siyasətinin coğrafi spektrinin genişləndiyini göstərir.
Yaxın Şərqdə gərginliyin artdığı bir dövrdə İrana baş tutan səfərlər Bakı-Tehran xəttində körpülərin yenidən qurulmasına xidmət edib. Bu səfərlər həm də Azərbaycanın qonşularla dialoq imkanlarını tükətmək istəmədiyini, sərt ritorikaya rəğmən münasibətlərin tamamilə pozulmasına maraqlı olmadığını göstərir.
Təsadüfi deyil ki, bu ilin aprel ayında İran Prezidenti Məsud Pezeşkian Azərbaycana səfər edib və Tehranda səfirliyimizə hücum edən terrorçu layiq olduğunu cəzanı alıb.
Bakı artıq Yaxın Şərqdəki güc balansında passiv izləyici deyil. Ən diqqətçəkən hadisələrdən biri isə İsrail və Türkiyə rəsmilərinin Bakıda görüşməsidir. İki ölkə Bakıdakı görüşlərdən sonra yol xəritəsi hazırlamaq barədə razılığa gəliblər.
Azərbaycan bu görüşlərlə özünü sadəcə tərəf kimi deyil, həm də vasitəçi və dialoq platforması kimi təqdim edir. Bu, artıq regional diplomatiyada yeni mərhələnin başladığını göstərir.
Hikmət Hacıyevin bu həftə Brüsselə səfəri Azərbaycanın yalnız regionla deyil, Avropa İttifaqı, NATO ilə də fəal diplomatik təmaslar qurduğunu göstərir. Ermənistanla sülh gündəliyinin formalaşması fonunda baş tutan bu səfər yalnız bu məsələ ilə məhdudlaşmır. Siyasi əməkdaşlıq, enerji və təhlükəsizlik mövzuları da səfərin əsas gündəmində olub.
Qeyd edək ki, Brüssel sadəcə Aİ və NATO-nun qərargahı deyil, orada səslənən hər fikir beynəlxalq siyasi xəritəyə təsir edir. Azərbaycan məhz bu məkanda öz mövqeyini təsirli formada ifadə edir.
Brüsselə səfər göstərir ki, Azərbaycan artıq diplomatiyada hadisələrin arxasınca getmir, onları qabaqlamağa, yeni proses yaratmağa çalışır. Avropa İttifaqı və NATO ilə eyni gündə keçirilən görüşlər Azərbaycanın qlobal təhlükəsizlik platformalarında oyunçu kimi qəbul edildiyini sübut edir.
Azərbaycan diplomatiyası uzun illər "status-kvonu qoruma", "qarşı tərəfin addımlarına reaksiya vermə" modelindən çıxaraq, bu gün proaktiv, çoxşaxəli və balanslı yanaşmaya keçib. Azərbaycan regional güc balansının iştirakçısı olmaqla yanaşı bu balansı formalaşdıran aktorlardan biridir.
Siyasi cəbhədə atılan addımlar, energetika, nəqliyyat və təhlükəsizlik sahələrindəki təşəbbüslərlə üst-üstə düşür. Bu isə diplomatiyanın konkret milli maraqlara xidmət edən prosesə çevrildiyinin bariz sübutudur.
Beləliklə, dünənin gözləmə mövqeyində dayanan Azərbaycanı artıq yoxdur. Bu gün diplomatiyamız dinamikdir, çevikdir və hesablanmış addımlar atır.
Yaxın Şərqdən Avropaya, türk dünyasından beynəlxalq təşkilatlara qədər qurulan bu yeni əlaqələr zənciri Azərbaycanın beynəlxalq münasibətlər sistemində artan çəkisini əks etdirir. Və yeni mərhələdə Bakı regional gələcəyi formalaşdırmağa çalışır.
Modern Təhlil və Araşdırma Qrupu
