Azərbaycanda mina təhlükəsi yenidən gündəmdədir.

Modern.az-ın məlumatına görə, son bir həftədə Kəlbəcər, Goranboy və Ağdərə rayonlarında 4 müxtəlif mina partlayışı qeydə alınıb.

Nəticədə biri hərbçi olmaqla dörd nəfər xəsarət alıb.

Mayın 29-da Kəlbəcər rayonunun İstisu kəndində Azərbaycan Ordusunun hərbçisi Xudaverdi Sadıqov piyada əleyhinə minaya düşüb. Hadisə saat 10:10 radələrində ərazinin mina və partlamamış döyüş sursatlarından təmizlənməsi zamanı baş verib. 

Ertəsi gün, mayın 30-da Ağdərə rayonunun Qızıloba kəndi ərazisində mal-qara otaran zaman mülki şəxs – Tərtər rayon sakini Telman Hüseynov minaya düşüb. Bu ərazidə 1992-ci ildə Telman Hüseynovun atası Əhməd Hüseynov da eyni şəkildə mina partlayışında həlak olub. Bu dramatik oxşarlıq Qarabağ minalarının nəsillər boyu təhlükə mənbəyi olduğunu bir daha göstərir.

Mayın 31-də Goranboy rayonunun Qaraçinar kəndi ərazisində Kəlbəcər sakini Qalib Abbasov mina partlayışına düşərək ağır xəsarət alıb. O da mal-qara otararkən partlayışla üzləşib.

İyunun 1-də isə Kəlbəcərin Susuzluq kəndində traktorun minaya düşməsi nəticəsində sürücü - 1989-cu il təvəllüdlü Rəşadət Əsədov xəsarət alıb.

Ard-arda 4 gün baş verən mina hadisələri Ermənistanın basdırdığı minaların dəhşətini bir daha xatırladır. Vətən müharibəsindən sonra mina partlayışları nəticəsində 400 Azərbaycan vətəndaşı həlak olub və ya yaralanıb.

Qeyd edək ki, Vətən müharibəsindən sonra 202 min hektardan artıq ərazi mina və döyüş sursatlarından təmizlənib. ANAMA-nın məlumatına görə, bu müddət ərzində 196 mindən çox mina və sursat aşkarlanıb. Təmizləmə proseslərinə Müdafiə Nazirliyi, Daxili Qoşunlar, Fövqəladə Hallar Nazirliyi və iki yerli şirkət də cəlb olunub.