11 iyun 2023-cü ildə Bakı İdman Sarayında Azərbaycanda ilk böyük oyun sərgisi olan “GameSummit” təşkil olunacaq.

Təşkilatçıların Modern.az-a bildirdiyinə görə, ölkənin geymerlərini, kospleyerlərini və bütün maraqlı və qeyri-adi istirahət sevən insanlarının toplaşdığı bu festivalın hər bir iştirakçısı Azərbaycan və beynəlxalq kompüter, konsol və mobil oyunlar dünyasına qoşula, oyun tərtibatçıları ilə tanış ola biləcək.

GameSummit-də müxtəlif maraqlı və fərqli, simulyatorlar da daxil olmaqla, oyun turnirləri, iştirakçılar arasında ən yaxşı oyunçuların seçilməsi, klassik oyunların atmosferinin yenidən canlandırılması və oyun lövhələrində strateji döyüşlərdən həzz almaq üçün retro oyun və stolüstü oyun çempionatlarının təşkili, keçmişin məşhur hit oyunlarının oynanılması nəzərdə tutulur.

Tədbir çərçivəsində hər kəsin unikal oyun təcrübəsi əldə etmək və təşkil olunan VR zonada ən son virtual əyləncədən həzz almaq imkanı olacaq.

GameSummit-in müasir oyun noutbukları və stolüstü kompüterlərlə təmin olunması nəzərdə tutulur ki, oyunçuların diqqəti əsas mövzüdan – oyun oynamaqdan yayınmasın. Hər bir iştirakçı istənilən turnirə qoşula və sərgidə təqdim olunan oyunları tamamilə ödənişsiz oynaya,  istənilən yarışda gücünü və bacarığını sınaya bilər.

Kospley müsabiqəsi tədbirin mühüm hissəsidir, burada iştirakçılar oyunlar, anime, komikslər və gik mədəniyyətinin digər sahələrdən geyimlərini nümayiş etdirə biləcək, tanınmış xarici kospleyer ustalığın sirlərini və zəngin təcrübəsini iştirakçılarla bölüşəcəklər.

Tədbirin proqramına iştirakçılara unudulmaz emosiyalar və təəssüratlar bəxş edəcək K-Pop rəqsləri və kaverlər də daxildir.

Sərgidə, həmçinin oyunlara, animelərə, komikslərə və ümumilikdə gik mədəniyyətinə aid müxtəlif aksesuarlar və suvenirlər əldə etmək imkanı olacaq.