Laurentsiu Regekampfla yollarını ayıran “Neftçi” klubunda yeni baş məşqçinin kim olacağı hələ dəqiqləşməyib.
Modern.az xəbər verir ki, “Neftçi” komandası “Match TV” turnirində iştirak etmək üçün Rusiyanın Sankt-Peterburq şəhərinə baş məşqçisiz yollanacaq.
Komandanı oyunlara seleksiyaçılar - Vadar Nuriyev və İqor Getman çıxaracaqlar. Paytaxt klubu sabah Rusiyaya yollanacaq.
“Neftçi” baş məşqçi postu üçün türkiyəli mütəxəssis Sergen Yalçınla danışıqlar aparsa da, hələlik anlaşma əldə etmək mümkün olmayıb. Komandanın yeni çalışdırıcısının Rusiyada müəyyənləşəcəyi gözlənilir.
Qeyd edək ki, “Neftçi” Sankt-Peterburqda “Fənərbağça” (Türkiyə), “Srvena Zvezda” (Serbiya) və “Zenit”lə (Rusiya) üz-üzə gələcək. Daha sonra Moskvaya yollanacaq komanda “Spartak”a qarşı yoxlama oyunu keçirəcək.
