Azərbaycan gələn il sumo üzrə dünya çempionatına ev sahibliyi edəcək. Müvafiq qərar Polşanın Krotoşin şəhərində Beynəlxalq Sumo Federasiyası tərəfindən qəbul edilib.

Yapon Döyüş Növləri və Mədəniyyəti Assosiasiyası tərəfindən irəli sürülən namizədlik mübarizəsində Azərbaycan digər ölkələri qabaqlayaraq dünya çempionatına ev sahibliyi hüququ qazanıb.

Sosial şəbəkələrdə xəbər maraqla qarşılanıb. Uzaq Şərqə məxsus idman növü üzrə dünya çempionatının Azərbaycanda keçirilməsi müzakirələrə səbəb olub.

Ancaq sumo döyüşləri Azərbaycan idmanına o qədər də yad deyil. Azərbaycanın sumo üzrə yığıması var və azərbaycanlı idmançılar komanda tərkibində müxtəlif yarışlarda iştirak edir.

Yapon Döyüş Növləri və Mədəniyyəti Assosiasiyasının (JMACA) vitse-prezidenti Ülvi Ağamirov Modern.az-a açıqlamasında bildirib ki, Azərbaycan bundan əvvəl sumo yarışlarda iştirak edib və hətta medal qazanıb.

"Sumo üzrə yığma komandamız son dünya çempionatında 2 bürünc medal qazandı. Ondan əvvəl Tokioda keçirilən dünya çempioantında da komandamız bir gümüş medal qazanıb. Təəssüf ki, hələlik qızıl medal əldə edə bilməmişik”, - o qeyd edib.

Ü.Ağamirov qeyd edib ki, yarışlar müxtəlif kateqoriyalarda keçirilir:

“Çəkilər üzrə yeniyetmələr və böyüklər 5-6 kateqoriyada yarışır. Ölkələr yarışlarda təqribi 11-12 idmançı ilə təmsil olunacaq. Azərbaycan komandası ilə biz də çalışacağıq ki, mövcud olan bütün katerqoriyalar üzrə iştirak edək. Hər kateqoriya üzrə hər ölkədən bir yeniyetmə və bir böyük idmançı iştirak edə bilər. Biz də hər kateqoriyada bir böyük və 1 yeniyetmə olmaqla təmsil olunacağıq”.

Müsahibimiz sonda vurğulayıb ki, qadınlar arasında da sumo üzrə dünya çempionatı keçirilir:

“Biz hələ ki, qadınlar arasında keçirilən yarışlarda təmsil olunmamışıq, amma 2026-cı ilə qədər bunu da təmin etməyi düşünürük”.

Qeyd edək ki, sumo Yaponiyada qədim dövrlərə gedib çıxan və bir çox adət və ənənələrə əsaslanan ənənəvi güləş növüdür. Yapon sözü sumo "özünü müdafiə etmək" mənasını verən sumafu sözündəndir.

Güləşçilərin məqsədi rəqibi yarış meydançası olan qum hovuzundan və ya saman iplə işarələnmiş rinqdən çıxarmaq yaxud müvazinətini itirib yerə yıxmaqdır. Güləşçilər ayaqlarının altından başqa hər hansı bir yeri ilə yerə toxunarsa, matçı uduzmuş sayılırlar.