Ukraynanın Gənclər və İdman Nazirliyi Kiyev “Dinamo”sunun keçmiş müdafiəçisi, hakim “Gürcü arzusu” partiyasının hazırkı baş katibi, Tbilisi şərinin meri Kaxa Kaladzeni “Ukraynanın beynəlxalq dərəcəli idman ustası” titulundan məhrum edib.
2024-cü ilin dekabrında Kaladze Gürcüstan hakimiyyətinin digər 18 nümayəndəsi ilə birlikdə Ukraynanın sanksiya siyahısına daxil edilib.
Modern.az xəbər verir ki, Kaladze jurnalistlərə açıqlamasında bu məsələyə münasibət bildirib.
“Açığını deyim ki, bu statusdan ümumiyyətlə xəbərim yox idi, doğrudan maraqlı deyil”, - Kaladze deyib.
Bundan əvvəl Ukrayna Futbol Assosiasiyasının prezidenti Andrey Şevçenko Kiyev “Dinamo”sunda və İtaliyanın “Milan” klubunda komanda yoldaşı olmuş Kaxa Kaladzenin siyasi fəaliyyətini şərh edib.
Şevçenkonun sözlərinə görə, onun keçmiş komanda yoldaşı artıq onun üçün yoxdur və o, Kaladze də daxil olmaqla bir sıra gürcü siyasətçilərinə qarşı sanksiyalar tətbiq edən Vladimir Zelenskini dəstəkləyir.
Cavabında Kaladze bildirib ki, “Milan”ın keçmiş hücumçusu Andriy Şevçenko bu gün yas mərasimində iştirak edir və gürcü ənənələrinə görə, onunla polemikaya girmək olmaz.
Kaladze və Şevçenko 90-cı illərin sonunda Kiyev “Dinamo”sunda, daha sonra isə İtaliyanın “Milan”ında birgə çıxış ediblər. Onlar “Milan”ın heyətində UEFA Çempionlar Liqası, Superkubok, A seriyası və İtaliya kubokunun qalibi olublar. 2001-ci ilin yanvarında Kaladzenin “Milan”a transferinə məhz Şevçenko şərait yaratmışdı. Onda ukraynalı futbolçu artıq iki il idi ki, “Milan”sa oynayırdı.
2024-cü ilin dekabrında prezident Vladimir Zelenski rəsmi Kiyevin Tbilisidə dinc etirazların dağıdılmasında iştirak edən Gürcüstan hakimiyyətinin 19 nümayəndəsinə qarşı 10 il müddətinə sanksiya tətbiq edib. Kaxa Kaladze də sanksiyalara məruz qalıb.
