Azərbaycanın Futbol üzrə Milli Komandası son qarşılaşmalarda ard-arda məğlubiyyətlərlə üzləşib. Milli komandamız Haiti ilə qarşılaşmada "3:0", Belarusla qarşılaşmasında isə "2:0" hesabı ilə məğlub olub. Bu isə azərbaycanlı azerşkeşləri, futbol həvəskarlarını məyus edib.
Millinin baş məşqçisi Fernando Santuş isə qalib gəlmək üçün komandanın əllərindən gələni etdiyini bildirib.
"Dəfələrlə demişəm. Bəlkə də hamıdan çox üzgünəm. Karyeram boyu bu qədər uduzmamışdım. Öz işimə inanıram, oyunçuların potensialına da inanıram. İstədiyimiz nəticələri əldə edə bilərik", - o, son oyundan sonra bildirib.
Qeyd edək ki, Santuş baş məşqçi təyin edildən sonra Azərbaycan millisi 8 oyun keçirib, onların 7-sini məğlub olub, biri isə qolsuz başa çatıb.
Modern.az-a açıqlamasında Milli Məclisin İctimai birliklər və dini qurumlar komitəsinin sədri Fazil Mustafa bildirib ki, hazırda futbola iki cür baxış mövcuddur:
"Futbola təsərrüfat sahəsi, bir də dövlətin idman strategiyasının vacib istiqaməti kimi baxış var. Hələ ki, təsərrüfat kimi baxış biraz daha önə çıxıb. Futbolun inkişafına yanaşma məhz bu baxışdan qaynaqlanır. Biz buna, həqiqətən də, dövlətin idman strategiyasının ən vacib istiqaməti kimi baxsaq, bu sahədə tamamilə fərqli islahatlar keçirməyimiz mümkün olacaq. Hələ ki, bu islahatlar həyata keçirilmir. Baxın, bizdə futbolun inkişafı ilə bağlı dövlət proqramları qəbul olundu, onların icrasının demək olar ki, 60 %-i gerçəkləşmədi. Bu çox ciddi məsələdir. Uşaq futbolu ilə, meydançalarla bağlı məsələlər öz həllini tapmadı. Yenə də meydançalarda yaşayış binaların tikilməsi, meydançaların keyfiyyətli şəkildə salınması, mövcud idman komplekslərinin uşaqlar və gənclər tərəfindən istifadəsinin işlək mexanizmini yarada bilmədilər. Futbolun gerilməsi uşaq futbolunun ümumiyyətlə bərbad vəziyyətdə olması ilə bağlıdır.Burada xüsusilə də meydança qıtlığı öz sözünü deyir. Yəni normal döşəməsi olan meydança Azərbaycanda ciddi problemdir. Təlim-məşq toplantıları keçirmək mümkün deyil. Elə komandalar var ki, özünün meydançası yoxdur. "Gəncə" kimi komanda niyə gedib Tovuzda oyununu oynamalıdır, yaxud da kimsə gedib Qəbələdə oynamalıdır. Yəni bu komandaların meydança problemi də ciddi narahatedici məsələlərdən biridir".
Komitə sədri söyləyib ki, çempionat güclü olmayanda futbolçuların yetişməsi, hətta xaricdən futbolçuların ölkəyə gətirilməsi problem olur:
"Ölkədə bir favorit komanda var və o da hansısa formada rəqabətsiz oynayır. Belə rəqabətsiz mühitdə də kimsə oynamağa maraq göstərmir. Süni meydançaların sayı çox olduğuna görə zədələnməmək üçün müəyyən dərəcədə futbolçular ölkə çempionatında çıxış edən komandalara transfer olmağa maraq göstərmirlər. Bu gün Azərbaycan futbolunu nisbətən ayaqda tutan "Qarabağ" komandasıdır. "Qarabağ" futbol komandası Avropa liqasına qaldığına görə, yerdə qalan komandaların hər birinə 1 milyon avro pul qazandırdı. Bu elə-belə məsələ deyil. Bir komanda irəlidə olanda digər komandalar müəyyən qədər sıxıntılarını aradan qaldıra bilir. Bir-iki belə komandamız olsa, bu komandaların maddi-texniki bazası, maliyyə məsələlərinin çözülməsinə şərait yaradar. O baxımdan məşqçini qınamaq olmaz ki, sən yaxşı oynamırsan. Bu futbolçunu haradan gətirsin, Marsdan futbolçu gətirəcək?
Gələn yeni məşqçi də ümidverici komanda prespektivini ortaya qoymur. Konsepsiyası bəlli deyil. 3 il üstəgəl 1 il müqavilə bağlamısan, amma ipucu verməlisən ki, sən dönüş yaratmağa çalışırsan. Təbii ki, bunun çətin olduğunu başa düşürük. Çünki xaricdə oynayan oyunçumuz yox, hansısa 5-6 aparıcı Avropa komandasında oyunçu olsa, bunun hesabına topu qapıya düzgün vuran 2-3 oyunçumuz olar. Bu da yoxdur. Bu baxımdan onun seçim imkanı məhduddur. Yerli çempionatdan da istədiyi səviyyədə adamları çıxarmaq olmur, milli komandada oynayır, amma beynəlxalq təcrübəsi, sürəti, dözümlülüyü kifayət qədər olmadığına görə bu rəqabətə tab gətirmir. Ona görə də millinin uduzması məsələsi normal qarşılanmalıdır. Amma burada bizim yanaşmamız budur ki, komanda onsuz da məğlub olursa, vəsaiti xarici məşqçiyə ödəməkdənsə, yerli məşqçinin yetişməsinə şərait yaratmalıyıq. Qoy, elə öz məşqçimiz uduzsun. Öz məşqçimiz uduza-uduza ən azı bir mərhələdə duracaq, komandanı atıb getməyəcək, onunla bir yerdə inkişaf edəcək. Bu baxımdan futbol idarəçiliyində də ümidverici mesajlar, yanaşmalar görünmür. Ona görə də məğlubiyyətlər seriyası bundan sonra da eyni qayda da davam edəcək".
