Ölkəyə turist axının cəlb edilməsi üçün prezident İlham Əliyev “Azərbaycan Respublikasında turizmin inkişafı ilə bağlı əlavə tədbirlər haqqında” sərəncam imzalayıb.
Sərəncama əsasən, bununla bağlı Xarici İşlər Nazirliyi, Mədəniyyət və Turizm Nazirliyi ilə birlikdə təkliflər hazırlayıb 2 ay müddətində prezidentə təqdim etməlidir.
Ölkəyə turist axının təmin edilməsi ilə məqsədilə belə bir sərəncamın imzalanması nəyi dəyişəcək?!
İqtisadçı Vüqar Bayramov Modern. az-a açıqlamasında deyib ki, turizm sahəsi ilə bağlı belə bir sərəncamın imzalanması məqsədəuyğun haldır.
“ Xüsusi nümayəndələrin olması birmənalı şəkildə bizə imkan verir ki, daha çox turistin cəlb edilməsinə nail olaq. Turizmin qeyri-neft sektorlarından əsas fərqi ondan ibarətdir ki, turizm, daha çox qısa zamanda gəlir əldə edilməsinə, ölkəyə vəsaitin daxil olmasına şərait yaradır. Nəticədə qeyri-neft sektoru turizmin inkişafından faydalanmış olur. Ona görə də nümayəndələrin yaradılması vacibdir. Ölkə prezidentinin imzaladığı sənəddə qeyd olunduğu kimi , nümayəndəliyin yaradılması ilə yanaşı, turizm sektorunun yaxından dəstəklənməsinə ehtiyac var”.
Turizm sektoruna güzəştlərin tətbiqi zəruridir
Ekspertin sözlərinə görə, hər bir turistin Azərbaycanla bağlı yanaşmaları müxtəlifdir.
“Hər bir ölkədə yaşayan turistin Azərbaycana yanaşması fərqlidir. Bir çox Avropa ölkələri üçün Azərbaycanın çimərliyi və ya dağı, meşə turizmi , bəziləri üçün isə tarixi daha cəlbedicidir. Bu baxımdan hər bir nümayəndəlik, ölkənin xarakterinə uyğun olaraq, həmin ölkədə turistik baxımından yanaşmaları nəzərə alaraq Azərbaycanın potensialını tətbiq etməlidir. Ona görə də prezidentin sərəncamı doğru addımdır. Bununla yanaşı, daxildə turizmə dövlət dəstəyinin artırılması baş verərsə, nəticədə bu, turizmin inkişafını stimullaşdıra bilər. Turizm sektoruna vergi , eləcə də, gömrük güzəştlərinin tətbiq edilməsi vacibdir. Turizm zonaları yaratmaq istəyiriksə, eləcə də, yaradılacaq turizm zonalarına xaricdən təbliğat məqsədilə daha çox turist cəlb etmək fikrindəyiksə, birmənalı şəkildə turizm sektoru, dövlət tərəfindən birbaşa və dolayı təkliflər formasında dəstəklənməlidir . Bu həm aşağı faizli subsidiyaların verilməsi, həm də güzəştlərin tətbiq ediləsi formasında ola bilər”.
Səfirliklər arasında rəqabət mexanizmi yaranacaqmı?!
Vüqar Bayramov yeni sərəncamın tətbiqindən sonra belə bir halın yaranmayacağı qənaətindədir.
“Düşünmürəm ki, turist cəlb etmək məsələsində səfirliklər arasında rəqabət mexanizmi olsun. Çünki elə ölkələr var ki, ordan turist cəlb etmək mümkün deyil. Hər bir ölkənin ayrıca turizm potensialı, turizm imkanları var. Həmin ölkələr turist olaraq Azərbaycana gəlməyə maraq göstərmirlər.
Elə ölkələr var ki, oradan turist cəlb edilməsi mümkündür. Turistlərin sayı baxımından rəqabətin təmin edilməsi mümkün deyil.
Bütün hallarda güman olunur ki, daha çox turist cəlb etmək həm də ölkənin daha yaxşı tanıdılması ilə bağlı olacaq. Təbii ki, daha çox turist cəlb etmək həm də səfirliyin fəaliyyətini qiymətləndirmək baxımından əhəmiyyətli göstəricilərdən biri olacaq. Amma, əsas göstərici olmayacaq”.
Namidə BİNGÖL
