2024-cü il üçün Azərbaycan Respublikasının daxili borclanmasının yuxarı həddi 2300,0 mln. manat, xarici borclanmanın yuxarı həddi 1700,0 mln. manat, dövlət zəmanətlərinin məbləğinin yuxarı həddi isə 700,0 mln. manat məbləğində müəyyən edilib.
Modern.az-ın məlumatına görə, bu barədə “Azərbaycan Respublikasının 2024-cü il dövlət büdcəsi haqqında” qanun layihəsində bildirilib.
Növbəti ildə limitin xarici borclanma üzrə cari ilə nisbətən 126,7%, daxili borclanma üzrə 27,8% artırılması, dövlət zəmanəti üzrə isə 30,0% azaldılması nəzərdə tutulub.
2024-cü ildə birbaşa xarici dövlət borcu üzrə 2363,0 mln. manat (1390,0 mln. ABŞ dolları), o cümlədən 2024-cü ildə vaxtı çatan beynəlxalq maliyyə bazarlarında yerləşdirilmiş xarici valyuta nominallı dövlət qiymətli kağızları (avrobondlar) üzrə 1530,0 mln. manat (900,0 mln. ABŞ dolları) əsas borc ödənişlərinin xarici investorlara geri ödənilməsi proqnozlaşdırılır.
