Rusiya Federasiyası Baş nazirinin birinci müavini Andrey Belousov Azərbaycan Baş nazirinin müavini Şahin Mustafayevlə müzakirə aparıb.
Modern.az xəbər verir ki, bu görüş Şahin Mustafayevin oktyabrın 31-də Rusiya Federasiyasına işgüzar səfəri çərçivəsində baş tutub.
Söhbət zamanı baş nazir müavinləri Şimal-Cənub beynəlxalq nəqliyyat dəhlizinin dəmir yolu marşrutunun inkişafı məsələlərini müzakirə ediblər.
Oktyabrın əvvəlində Belousov və Mustafayev nəqliyyat-logistika sektorunda əməkdaşlığın perspektivlərini, o cümlədən Şimal-Cənub dəhlizi layihəsinin həyata keçirilməsini müzakirə etmişdilər.
Şimal-Cənub beynəlxalq nəqliyyat dəhlizi Sankt-Peterburqdan Mumbay limanına çatan (Hindistan) uzunluğu 7,2 min kilometr olan multimodal marşrutdur. Onun üç marşrutu var: transxəzər (dəmir yolları və limanlardan istifadə etməklə), həmçinin qərb və şərq (yerüstü). 2023-cü ilin mayında Rusiya və İran qərb Şimal-Cənub marşrutu üzrə dəmir yolunun son zəruri hissəsinin - İranda Rəşt-Astara hissəsinin tamamlanması ilə bağlı sənədlər imzalayıblar.
