"Bizim bu il Bakı metropoliteni üçün vaqonların tədarükü ilə bağlı böyük layihəmiz var, 35 vaqon - bu, çox böyük layihədir".
Modern.az xəbər verir ki, bunu "İzvestiya"ya müsahibəsində Rusiyanın Azərbaycandakı fövqəladə və səlahiyyətli səfiri Mixail Yevdokimov deyib.
"Bakının inkişafı üzrə baş planda tramvaylardan istifadə nəzərdə tutulduğundan elektrik avtobusları və tramvaylarla bağlı başqa layihələr də var", - o əlavə edib.
"Xüsusilə Rusiya, Azərbaycan, İran və Türkiyə arasında malların tədarükü üçün Azərbaycan dəmir yolundan istifadə imkanlarının genişləndirilməsi layihələrinin əlaqələndirilməsi yaxınlaşır. Bu da bu il həyata keçiriləcək", - diplomat vurğulayıb.
Qeyd edək ki, plana əsasən, 2040-cı ilə qədər tramvay şəbəkəsinin 54.6 kilometr uzunluğunda olması nəzərdə tutulub. Ümumilikdə 78 stansiya və dayanacaq yaradılacağı bildirilir.
