Bitkoinin qiyməti Donald Trampın ABŞ prezident seçkilərində qalib gəlməsindən sonra bir həftə ərzində 30 faizədək bahalaşıb. Amerikanın Bitkoin mübadiləsi fondlarına vəsait axını noyabrın əvvəlində 1 milyard dolları ötüb. Bu kriptovalyutanın qiyməti tarixdə ilk dəfə 93 min dolları keçərək bütün zamanların ən yüksək həddini yeniləyib.
Tramp kriptovalyutaların müdafiəçisi amerikalı milyarder İlon Maskı Hökumətin Effektivliyi Departamentinin (DOGE) rəhbəri vəzifəsinə təyin edib. Qeyd edək ki, yeni departamentin adı "Dogecoin" (DOGE) kriptovalyutası ilə bağlıdır.
Bir çox ekspert Trampın seçilməsinin və Maskın vəzifəyə təyin edilməsinin kriptovalyuta bazarında dalğalanmalara səbəb olacağını düşünür.
Mövzu ilə bağlı Modern.az-a danışan iqtisadçı ekspert Xalid Kərimli bildirib ki, İlon Maskın hansısa vəzifəyə təyin edilməsi kriptovalyuta bazarına ciddi təsir etməyəcək:
“Zatən Donald Trampın hakimiyyətə gəlməsi ilə kriptovalyuta bazarında ciddi qiymət artımı müşahidə olunur. Hətta Trampın prezident seçilmə ehtimalının artması ilə 60 mindən aşağı düşən qiymətlər yenidən qalxmağa başladı”.
Ekspertin sözlərinə görə, kriptovalyuta bazarında olan artım məhz Donald Trampın prezident seçkilərində qalib gəlməsi ilə əlaqədardır:
“Yəni İlon Maskın hansısa vəzifəyə təyin edilməsi kriptovalyutanın artmasına ciddi təsir etməyəcək. Amma Trampın bu bazara münasibəti, İlon Mask kimi liberal şəxsləri ətrafına yığması müsbət təsir edir. Amma biz bazardakı dəyişiklikləri birbaşa Trampla əlaqələndirməliyik. Tramp vəzifədə olsun yaxud olmasın, bazarlara ciddi təsir göstərə bilən şəxsdir”.
