Gürcüstanda siyasi böhran və etirazlar səbəbindən milli valyuta lari son 2 ilin ən aşağı səviyyəsinə enib. Ölkədə 1 ABŞ dollar  2,8799 lariyədək yüksəlib. Amma son günlər kurs 2,82 lari səviyyəsinə düşüb.

Bloomberg-in məlumatına görə son 1 həftədə Gürcüstan larisinin dəyəri 2,5 faiz azalıb, bu da son 2 il ərzində ən aşağı göstəricidir. Bir ay əvvəllə müqayisədə isə məzənnə 2,69 laridən 2,87 lariyədək artıb. Məzənnənin dəyişmə tempi noyabrın 27-dən sürətlənib, bu da etirazların başladığı ilk günlərə təsadüf edir.

Gürcü ekspertlər hesab edir ki, hakimiyyətin 2028-ci ilə qədər Avropa Birliyinə üzvlük danışıqlarını təxirə salması geniş etirazlara səbəb olub və bütün bunlar Gürcüstanın iqtisadi sabitliyinə və beynəlxalq nüfuzuna təhdid yaradır. Son günlər larinin dəyərdən düşməsi iqtisadiyyata etibarın azalmasına, inflyasiya təzyiqinin artması təsir edəcək. Xarici ticarət əlaqələrində də əks təsirlər müşahidə olunacaq.

Artıq  qarşıdurmaların yaratdığı daxili qeyri-sabitlik iqtisadi vəziyyətə təsir edib. Tiflisdə  kütləvi aksiyalar şəhərin mərkəzində biznes fəaliyyətini pozub və yerli sahibkarların gəlirlərinin azalmasına səbəb olub.

Qərb ölkələri Gürcüstanın Avropa inteqrasiyasına dair prinsipləri pozduğu üçün ölkəyə təsirlərin olacağı barədə xəbərdarlıq ediblər. ABŞ dövlət katibi Entoni Blinken Gürcüstanda baş verən son hadisələrə münasibət bildirərkən, əlavə sanksiyalar tətbiq etməyi və Gürcüstanla olan əməkdaşlığı yenidən nəzərdən keçirməyi istisna etməyib.

Əgər siyasi böhran həll olunmasa Gürcüstan bir sıra iqtisadi çətinliklərlə üzləşə bilər.  Larinin dəyərdən düşməsi xarici borcun ödənilməsində çətinliklər yaşada bilər. Siyasi qeyri-sabitlik potensial investorlara qorxu yaradır, bu da strateji sahələrə olan investisiyaların azalmasına səbəb ola bilər. İnflyasiyanın yüksəlməsi əhaliyə və sahibkarlara əlavə yük gətirəcək.