MÜSİAD Azərbaycan İctimai Birliyi və Əczaçılar Klubu İctimai Birliyinin birgə təşkilatçılığı ilə Balaxanı Sənaye Parkında dərman sənayesi və köməkçi sənayenin inkişafına həsr olunmuş görüş keçirilib.
Modern.az-ın məlumatına görə, görüşdə dərman istehsalı və yan sənaye məhsullarının istehsalı ilə bağlı müxtəlif məsələlər müzakirə edilib. Tədbirdə tərəfdaş qurumların nümayəndələri və sahə üzrə fəaliyyət göstərən bir sıra yerli şirkətlərin rəhbərləri iştirak ediblər.
Tərəfdaşlar arasında "MÜSİAD Azərbaycan" İctimai Birliyinin sədri Rəşad Cabirli, “Əczaçılar Klubu” İctimai Birliyinin sədri Şövqi Bünyadov, KOBİA-nın Bakı və xüsusi zonalar üzrə koordinatoru Vüsal Qasımov və eyni departamentin KOB dostu İlkin Mikayılov yer alır. Balaxanı Sənaye Parkını isə sahə rəisi Fariz Əhmədov təmsil edir. Həmçinin görüşdə MÜSİAD Azərbaycan İctimai Birliyi tərəfindən yerli istehsalçılar, Əczaçılar Klubu İctimai Birliyi tərəfindən isə dərman sənayesi firmaları iştirak edib.
Görüş zamanı Azərbaycanın dərman istehsalı sektorunun mövcud vəziyyəti, potensial imkanları və inkişaf perspektivləri ətraflı şəkildə təhlil edilib. Xüsusilə, yerli bazarın kiçikliyi və rentabelliyi məsələsi gündəmə gətirilib. Bu çərçivədə kiçik və orta bizneslərin inkişafını təşviq etmək məqsədilə "KOB Klasteri" modelinin tətbiqi təklif olunub. Bu istiqamətdə dövlət dəstəyi və təşviqlərin təmin olunmasının vacibliyi vurğulanıb.
Tədbir iştirakçıları həmçinin dərman sənayesi üçün zəruri olan yan sənaye məhsullarının müəyyənləşdirilməsi və bu ehtiyacların yerli istehsalla qarşılanması məsələsini müzakirə ediblər. Gələcəkdə müvafiq strategiyaların işlənib hazırlanması üçün müvafiq şirkətlərlə iclasların təşkil edilməsi qərara alınıb.
Dərman sənayesinin ölkənin iqtisadi və sağlamlıq sektorundakı strateji əhəmiyyəti xüsusi vurğulanıb. Bu görüş, əczaçılıq sahəsində əməkdaşlığın gücləndirilməsi, yerli istehsalın dəstəklənməsi və Azərbaycanın bu sahədə beynəlxalq rəqabət qabiliyyətinin artırılması baxımından əhəmiyyətli bir addımdır.
MÜSİAD Azərbaycan və Əczaçılar Klubu bu istiqamətdə gələcək əməkdaşlığı daha da genişləndirmək və sektorun davamlı inkişafını təmin etmək məqsədilə fəaliyyətlərini davam etdirməyi planlaşdırır.
