“Prezident İlham Əliyev mətbuata dünənki müsahibəsində Bakı metropoliteninin 10 yeni stansiyasının inşa ediləcəyi barədə məlumat verdi. Özü də qeyd etdi ki, həmin 10 stansiyanın tikintisi, bəlkə də beş il çəkər. Bu məlumat paytaxtın ictimai nəqliyyatının gələcəyinə ümidləri artırır”.

Modern.az xəbər verir ki, bu fikirləri nəqliyyat məsələləri üzrə tanınmış ekspert Ərşad Hüseynov bildirib,

“Dəfələrlə vurğuladığımız kimi, paytaxtda tıxac və elementar yol hərəkəti təhlükəsizliyi probleminin həlli istisnasız olaraq ictimai nəqliyyatdan asılıdır. Mükəmməl ictimai nəqliyyatsız dayanıqlı mobillik və təhlükəsiz (yəni qəzasız, ölüm-itimsiz) yol olmur. Ona görə də həm metropolitenə, həm avtobus marşrutlarına, həm də şəhərətrafı qatarlara ciddi sərmayə qoyulmalı, imkan daxilində tramvay marşrutları bərpa edilməlidir”, - Ə.Hüseynov vurğulayıb.
 

Ə.Hüseynovun sözlərinə görə, 10 yeni metro stansiyaslnın harada tikiləcəyi barədə dəqiq məlumat açıqlanmasa da, Bakının baş planını və metropolitenin hazırkı vəziyyətini və ikişaf perspektivini nəzərə alanda, həmin stansiyalara harada daha çox zərurət olduğunu demək olar:



“Düşünürəm ki, Bakı metropolitenində ən zəruri işlər bunlardır:

1. Yaşıl və Qırmızı xətlərin ayrılması (yəni “Dərnəgül” stansiyasından gələn qatarların “28 May” satansiyasına deyil, “Cəfər Cabbarlı” satansiyasına və oradan “Xətai” satansiyasına keçməsinin təmin olunması);

2. “Dərnəgül” deposunun tikilməsi;

3. Yaşıl xəttin “Xətai” stansiyasından “Həzi Aslanov” stansiyası istiqamətinə yeni stansiyalarının və “Dərnəgül” stansiyasından “Koroğlu” stansiyasına tərəf yeni stansiyalarının tikilməsi və bundan sonra yaşıl xəttin dairəvi sxeminin təmin edilməsi;

4. Bənövşəyi xəttin mərkəzə doğru tikintisinin davam etdirilməsi (C.Məmmədquluzadə küçəsindəki stansiyanın açılışı və ondan sonrakı stansiyaların tikintisi), bu xəttin Xırdalan istiqamətinə uzadılması (Bakının baş planında bu nəzərdə tutulurdu, amma plan dərc ediləndən sonra onu hazırlayanlar bunu təkzib etdilər);

5. Qırmızı xəttin “İçərişhər” stansiyasından sonra Badamdar istiqamətində, “Həzi Aslanov” stansiyasından isə Zığ istiqamətinə inkişafı və s.».
 

Ə.Hüseynov deyib ki, Bakı metrosunun genişlənməsi 10 stansiya ilə məhdudlaşmamlıdır:

“Metro çox ciddi şəkildə, özü də daha sürətlə genişləndirilməlidir. Avropanın, Çinin, Yaponiyanın Bakı kimi şəhərlərinin metro stansiyalarının sayı çoxdan 200-ün üstündədir, hər il bir neçə stansiya tikilib istifadəyə verilir. Bizdə də dayanıqlı maliyyələşmə ilə, ən optimal texnologiyaları cəlb etməklə metronu şaxələndirmək lazımdır. Düzdür, bunun üçün böyük xərclər lazımdır (Bakının baş planında proqnozladırılan rəqəmlərdən aydın olur ki, bir metro stansiyasının tikintisinin orta qiyməti 187 milyon manat, bir kilometr ikitərəfli metro xəttinin tikintisinin orta qiyməti isə 127,5 milyon manatdır, yəni 10 stansiyanın tikintisinə təxminən 3,5-4 milyard manat pul xərclənməlidir). Amma bu vəsaitlər metronun inkişafına mütləq yönəldilməlidir, əks təqdirdə, Bakının nəqliyyat sistemi daha da pisləşəcək və paytaxda yaşamaq getdikcə daha çətin olacaq”.