2024-cü ildə Azərbaycan 91838 ədəd müxtəlif təyinatlı avtomobil idxal edib ki, bu da ümumilikdə 1 milyard 844 milyon 157 min dollar dəyərində olub. 

Modern.az Dövlət Gömrük Komitəsinə istinadən xəbər verir ki, ötən ilin müvafiq dövrü ilə müqayisədə avtomobil idxalı ümumilikdə 9,7% artıb.

İl ərzində 10 nəfər və daha çox adam daşımaq üçün nəzərdə tutulan motorlu nəqliyyat vasitələrinin idxalı 2,5 dəfə artaraq 405 ədədə (68,065 milyon ABŞ dolları dəyərində) çatıb. Əsasən adam daşımaq üçün nəzərdə tutulan minik avtomobilləri və digər motorlu nəqliyyat vasitələrinin idxalı isə 6,5% azalıb və 82434 ədəd (1 milyard 566,604 milyon ABŞ dolları dəyərində) olub. 

Elektrikli nəqliyyat vasitələrinin idxalı da nəzərə çarpan artım nümayiş etdirib. Daxili yanma mühərriki ilə yanaşı elektrik mühərriklə də hərəkətə gətirilən 26,197 avtomobil (679,49 milyon ABŞ dolları dəyərində) idxal edilib. Yalnız elektrik mühərriki ilə işləyən avtomobillərin sayı isə 3027 ədəd (12 606 milyon ABŞ dolları dəyərində) olub. Elektrik və daxili yanma mühərriki ilə işləyən avtomobillərin idxalı 85,8% artıb, yalnız elektrik mühərriki ilə hərəkət edənlərin sayı isə 2,4% azalıb.

Yük daşımaq üçün nəzərdə tutulan mühərrikli nəqliyyat vasitələrinin idxalı da artıb. Bu növ avtomobillərin idxalı 15,7% artaraq 8,430 ədəd (141,026 milyon ABŞ dolları dəyərində) olub. Xüsusi təyinatlı motorlu nəqliyyat vasitələrinin idxalı isə 53,8% artaraq 569 ədəd (68,461 milyon ABŞ dolları dəyərində) təşkil edib.

10 nəfər və daha çox adam daşımaq üçün nəzərdə tutulan motorlu nəqliyyat vasitələrinin orta qiyməti 168 min 802 dollar, əsasən adam daşımaq üçün nəzərdə tutulan minik avtomobilləri və digər motorlu nəqliyyat vasitələrinin orta qiyməti 19 min dollar, daxili yanma mühərriki ilə yanaşı elektrik mühərriki ilə işləyən avtomobillərin orta qiyməti 25 min 953 dollar, yalnız elektrik mühərriki ilə işləyən avtomobillərin orta qiyməti 40 min 163 dollar olub.