“Hazırda daşınmaz əmlak və mənzil bazarında dinamik qiymət artımının olduğunu deyə bilmərik”.

Bunu Modern.az-a açıqlamasında əmlak məsələləri üzrə ekspert Ramil Osmanlı deyib.

Onun sözlərinə görə, bəzi ərazilərdə nisbi artım meylləri var, amma dinamik qiymət artımları nəzərə çarpmır:

“Hesab edirəm ki, bu, ilin əvvəli üçün xarakterikdir. Hər ilin əvvəlində bu cür stabillik hökm sürür. Yəqin ki, yanvarın sonu, fevralın əvvəllərinə doğru bazara pul axını artacaq, ipoteka kreditlərinin verilməsinə başlanacaq. Bundan sonra müəyyən qiymət dəyişmələrinin şahidi ola bilərik. Hazırda isə vəziyyət stabildir”.

Ekspert bildirib ki, hazırda bazardakı vəziyyət keçən ilin eyni dövrü ilə oxşardır:

“Hər ilin əvvəlində olan sabitlik bu il də müşahidə olunur. Keçən il də ciddi qiymət artımları müşahidə olunmayıb. Aylıq ortalama qiymət artımları təqribən 1% ətrafında olub. Bazar üzrə ümumi qiymət dəyişməsi illik göstəricidə 11% təşkil edir. Bu göstərici ikirəqəmli olsa da, hesab edirəm ki, daşınmaz əmlak bazarı üçün böyük qiymət artımı demək deyil. Göstərici ümumi iqtisadiyyata qismən adekvat hesab oluna bilər. Əvvəlki illərdə 25-30% qiymət artımı müşahidə olunurdu. Ona görə də ötən ilki göstəricilərlə müqayisə etsək, indiki vəziyyət stabildir”.