Prezident İlham Əliyevin müvafiq Fərmanı ilə İqtisadiyyat Nazirliyinin strukturuna daxil olan Antiinhisar və İstehlak Bazarına Nəzarət Dövlət Xidməti ləğv edilərək onun bazasında yeni qurum – Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi yaradılıb.
Yeni Agentliyin birbaşa Prezidentə tabe olması ilə ölkədə inhisarçılıqla mübarizənin daha effektiv şəkildə aparılacağı gözlənilir. Ekspertlər bildirirlər ki, bu addım bazarda daha sağlam rəqabət mühitinin formalaşdırılmasına və istehlakçı hüquqlarının daha güclü qorunmasına xidmət edəcək.
Agentlik təkcə antiinhisar siyasətinə nəzarət etməklə kifayətlənməyəcək, həm də qiymətli metallar və daşların istehsalı, emalı, istifadəsi və dövriyyəsinə nəzarət funksiyasını icra edəcək. Bundan əlavə, emal edilməmiş almazların idxalı və ixracı, eləcə də onların uçotu və saxlanılması ilə bağlı rəsmi rəylərin verilməsi Agentliyin əsas səlahiyyətlərindən biri olacaq.
Ekspertlər deyir ki, bu dəyişikliklər dövlətin iqtisadi nəzarət mexanizmlərini gücləndirmək və qeyri-qanuni inhisarçılıq halları ilə mübarizəni daha səmərəli təşkil etmək məqsədi daşıyır. Agentlik bundan sonra tabeliyindəki qurumlar vasitəsilə bazarda şəffaflığın təmin olunmasına, ədalətli rəqabət mühitinin yaradılmasına və istehlakçı hüquqlarının qorunmasına daha geniş səlahiyyətlərlə nəzarət edəcək.
Bəzi iqtisadçılar hesab edirlər ki, bu struktur dəyişikliyi inhisarçı şirkətlərə qarşı daha sərt tədbirlərin görülməsinə imkan yaradacaq. Eyni zamanda, qiymətli metalların və daşların qanunsuz dövriyyəsinin qarşısını almaq üçün daha güclü nəzarət mexanizmlərinin tətbiq ediləcəyi gözlənilir.
Qeyd edək ki, Azərbaycanda inhisarçılıqla mübarizə uzun illərdir hökumətin gündəmindədir. Ekspertlər ümid edirlər ki, bu addım biznes mühitinin inkişafına da müsbət təsir edəcək, kiçik və orta sahibkarlığın bazarda daha güclü mövqe tutmasına şərait yaradacaq.
Modern.az mövzu ilə bağlı Millət vəkilləri Müşfiq Cəfərovla və Vüqar Bayramovla həmsöhbət olub.
Müşfiq Cəfərov bildirib ki, Agentlik heç bir dövlət qurumuna tabe olmayacaq.
"Düşünürəmki, bu addım qurumun fəaliyyətini daha da şəffaflaşdırıb, bitərəfliyinə əminlik yaradacaqdır. Fərmandan irəli gələrək, deyə bilərəmki, artıq Agentlik heç bir qurumun yanında fəaliyyət göstərməyəcəkdir, fəaliyyət prinsipi etibarilə gözlənilir ki, bir neçə dövlət qurumları Antiinhisar və İstehlak Bazarına Nəzarət Dövlət Agentliyinə tabeliyinə verilsin”.
Vüqar Bayramov qeyd edib ki, Antiinhisar və İstehlak Bazarına Nəzarət Dövlət Xidmətinin agentlik kimi fəaliyyət göstərməsi üçün Nazirlər Kabineti tərəfindən funksiyalarının müəyyənləşdirilməsi və digər texniki məsələlərin həlli yekunlaşdı:
“Antiinhisar və İstehlak Bazarına Nəzarət üzrə Dövlət Agentliyi Azərbaycan Respublikasının Prezidenti yanında ayrıca qurum kimi fəaliyyət göstərir. Əvvəllər bu qurum İqtisadiyyat Nazirliyi yanında fəaliyyət göstərirdi. Rəqabətin müdafiəsi birmənalı şəkildə iqtisadiyyatın inkişafı baxımından ən vacib hədəflərdən və prioritetlərdən biridir. İnkişaf etmiş ölkələrin, eləcə də qonşu Gürcüstanın təcrübəsində, rəqabətin müdafiəsindən məsul qurumun ayrıca bir qurum kimi fəaliyyət göstərməsi praktikası var”.
Azərbaycanda Rəqabət Məcəlləsi qəbul olunduqdan sonra artıq Antiinhisar və İstehlak Bazarına Nəzarət qurumunun səlahiyyətlərinin genişləndirilməsi və agentlik kimi fəaliyyət göstərməsi daha da aktuallaşdı. Bu baxımdan sözügedən qurumun səlahiyyətlərinin genişlənməsi istehlak bazarına nəzarət və rəqabətin genişlənməsi baxımından yeni imkanlar deməkdir. Yeni dövrün çağırışlarına uyğun olaraq rəqabətin müdafiəsi prioritetdir, daha da aktuallaşıb. Bütün bunlar fonunda yeni formalaşmış qurum Azərbaycan iqtisadiyyatında rəqabətin daha yaxından qorunması və inhisara qarşı mübarizənin genişləndirilməsini həyata keçirəcək”.
