Prezident İlham Əliyev fevralın 19-da Xocalı rayonunun Ballıca kəndində fərdi evlərin və infrastrukturun bərpası sahəsində görülən işlərlə tanış olmaqla yanaşı, bir qrup sakinlə də görüşüb. Dövlət başçısı Xocalıya köçən sakinlərin burada gördüyü işlər, şəxsi təsərrüfatları ilə də tanış olub. İlham Əliyev Ballıcadakı qonaq olduğu evdə yerli sakinlərin hazırladığı balın dadına baxıb. Səmimi keçən görüşlər sırasında Prezident bildirib ki, zəfərimizdən sonra ancaq Kəlbəcər və Laçın balını yeyir.
“İndi Ballıca balı da yedim”, - dövlət başçısı qeyd edib
Bəs bu bölgələrdə yetişən balın özəlliyi və keyfiyyəti digər ballardan nəyi ilə fərqlənir?
Modern.az mövzu ilə bağlı “KƏND BABA” brendli Kəlbəcər balının istehsalçısı Xalid Nağıyevlə həmsöhbət olub.
Müsahibimiz bildirib ki, balın keyfiyyəti onun hansı təbii şəraitdə istehsal olunmasından çox aslıdır:
“Bildiyiniz kimi, Kiçik Qafqazın, ələlxüsus da Kəlbəcərin zəngin təbiəti, bitki örtüyü, florası orada yetişən məhsullara, xüsusilə də balın keyfiyyətinə təsir edir. Təbiət nə qədər zəngindirsə, orada istehsal olunan bal da bir o qədər vitaminli, xeyirli olur. Demək olmaz ki, Aran balı pis olur və yaxud da bu ərazidəki arıçılar doğru-dürüst bal istehsal etmir. Proses eynidir, arını harada saxlamaqdan asılı olmayaraq, bütün arıçılar eyni işlə məşğuldurlar, amma təbiəti formalaşdıran arıçı deyil və balın keyfiyyətinə əsas da təbiət təsir edir”.
Bal istehsalında yerli arılara üstünlük verən arıçı qeyd edib ki, istər heyvandarlıq, istərsə də bitkilərin yetişdirilməsində hər bir coğrafi şəraitin özünə uyğun yerli məhsulu olur.
"İş adamları bəzən daha çox məhsul əldə edə bilmək üçün xaricdən müxtəlif növ heyvanlar, eləcə də arılar gətirirlər, bu normal prosesdir, amma mən yerli məhsulların istehsalında yerli heyvanlardan istifadənin tərəfdarıyam. Məsələn, biz Qafqazda yaşayan Qabaqtəpə, Boz Qafqaz arı növlərindən istifadə edirik.
Biz arıçılıq məhsullarımızı indiyədək bazara çıxarmamışıq, çünki arıçılıq bizdə nəsildən-nəsilə keçən ənənə olub. Buna görə də bal istehsalına hansısa qatqı əlavə etmək barədə düşünməmişik. Balın təmiz olub-olmaması kimi ağlımızda sual da olmayıb, çünki bizə görə tək alternativ balın təmiz olmasıdır. İndinin özündə də belədir, amma bazara çıxanda gördük ki, bizim nəzərdə tutuğumuz prinsiplər hər yerdə keçərli deyil”, - deyən arıçı vurğulayıb ki, müştərilərin də ağlında sual qalmasın deyə konkret addımlar atırlar:
“Bal istehsalçısı kimi əminəm ki, məhsulumuzda heç bir qatqı yoxdur, amma bunu həm də müştəriyə sübut etməliyəm. Bu işlə də Qida Təhlükəsizlik Agentliyi məşğul olur. Biz də öz növbəmizdə onlara istehsal etdiyimiz baldan nümunələr göndəririk, həmin nümunə xüsusi laboratoriyalarında analiz olunur və onun tərkibi müəyyənləşdirilir, göstəricilərə uyğun olaraq rəy verilir. Bu baxımdan bizim keyfiyyətli məhsul istehsal etməyimizə heç bir şübhə yeri qalmır”.
X.Nağıyevin fikrincə, müştərilər özləri də balının həqiqliyini yoxlaya bilərlər və istifadə olunan üsullardan biri də “genetik yaddaş” üsuludur:
“Belə ki, bir qədər balı nəlbəkiyə əlavə etdikdən sonra üzərinə ehtiyatla soyuq su əlavə olunur və ehmalca nəlbəkini sağa-sola hərəkət etdirməklə balın üzərindəki dəyişiklik nəzarətdə saxlanılır. Bir anda bal damlasının üzərində pətək şəkili formalaşır. Əgər bu hal müşahidə olunmursa, demək ki, balın təbiiliyi şübhə doğurmalıdır. Başqa bir üsul balın qaşıqdan necə süzülməsidir. Sonadək qırılmadan süzülürsə və bitdikdə qalan hissə qaşığa doğru qayıdırsa, bu da təbii bal hesab edilir”.
Müsahibimiz deyib ki, balçılıq, arıçılıq elə bir sahədir ki, o, insanın özündən, gücündən, keyfiyyətindən, işinə yanaşma tərzindən aslı deyil. Onun məhsuldarlığı təbii şəraitdən asılıdır:
“Xüsusilə Kəlbəcər kimi bir yerdə bol məhsul almaq kifayət qədər çətindir. Təcrübəli arıçıların fikrinə istinadən qeyd edə bilərəm ki, arı əsasən ehtiyat yığdığı balı iyul ayının 15-dən avqust ayının 10-a qədər toplayır. Həmin dövrə qədər arı sadəcə özünü qidalandırır. Birmənalı şəkildə deyə bilmərik ki, balın qiyməti 10 manat və ya 15 manatdır. Ancaq bal istehsalından asılı olmayaraq arılara qulluq həmişə göstərilməlidir”.
