Martın 1-dən başlayan Ramazan ayı və qarşıdan gələn Novruz bayramı restoranlarda canlanmaya səbəb olub. Ənənəvi olaraq, Novruz bayramında ailəvi süfrə başına yığışan insanlar, eyni zamanda, iftar vaxtı restoranlarda xüsusi menyulara üstünlük verirlər. Bu isə kafe və restoranlarda qiymət artımına təsir edib.

Bakıda və bölgələrdə fəaliyyət göstərən bir çox iaşə obyektləri iftar üçün xüsusi menyular təklif etməyə başlayıblar. Bu menyular əsasən şorba, salat, isti yemək, desert və çaydan ibarətdir. Qiymətlər restoranın səviyyəsindən və təqdim olunan yeməklərdən asılı olaraq dəyişir. Orta hesabla bir nəfərlik iftar menyusu 10-50 manat arasında dəyişir.

Bəzi restoran sahibləri Ramazan və Novruzun üst-üstə düşməsinin müştəri sayına müsbət təsir etdiyini bildirirlər. Lakin bəzi vətəndaşlar qiymət artımından narazıdır. Onların sözlərinə görə, əvvəlki illərlə müqayisədə restoranlarda yemək xərcləri daha yüksəkdir.

Modern.az-a danışan iqtisadçı ekspert Emin Qəribli bildirib ki, ümumilikdə, keçən ilə nisbətən qiymətlərdə dəyişim ola bilər.

"Amma bu menyuların kəskin bahalaşmasına gətirib çıxarmır. Bəzi işbazlar, fürsətdən istifadə edib, artımlar etməsi gözləniləndir. Lakin, bunu nəzərə almalıyıq ki, orucluq ilə əlaqədar olaraq, günorta saatlarında restoranlara üz tutanlar az olacaq, iftar zamanı isə bu dəyişəcək. Nəticədə, restoranlar arasında rəqabətin güclənməsinə şərait yaradır", - o qeyd edib.

Ekspert vurğulayıb ki, həftə boyu nəzər yetirsək, restoranlarda bir sıra şəxslər öncədən rezervlər edirlər:

"Tələbat artdıqca, bu da həm də restoranların paytaxtda və ətraf ərazilərində sayının artmasına gətirib çıxarır".

Zərif Sofiyeva