Azad İstehlakçılar Birliyinin (AİB) sədri Eyyub Hüseynov Modern.az redaksiyasının qonağı olub. O, istehlakçı hüquqlarının pozulması, istehlakçıları aldadan şirkətlər və digər mövzularda sualları cavablandırıb.

Müsahibədən bir hissəni təqdim edirik:

 

- Sosial şəbəkələrdə tez-tez piştaxta və kassada qiymətlərin fərqli olması ilə bağlı şikayət videoları yayılır. Belə hallar yaşandıqda istehlakçı hansı addımı atmalıdır?

- Piştaxta və kassada qiymətlərin fərqli olması halında istehlakçının hərəkət alqoritmi 2 cür olur. Birincisi, istehlakçı problemi yerində həll etmək istəyir. Bu zaman o, qiymət fərqini gördükdə kassa çekini də saxlamaq şərtilə marketə qayıdaraq malın qiymətinin şəklini çəkməlidir və müdiriyyəti çağırmalıdır. Bu zaman istehlakçının hüququ var ki, piştaxtada gördüyü məbləği ödəniş etsin. Müdiriyyət burada təslim olacaq, bir qayda olaraq qiymət dəyişdirməyi unutduqlarını bildirəcəklər. İstehlakçı artıq alınmış pulunu geri qaytaracaq.

İkincisi, istehlakçı problemi gördükdə bu halla üzləşəndə eyni şəkildə malın və qiymətinin şəklini çəkərək Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinə göndərə bilər. Bu zaman sözügedən market barədə müvafiq tədbirlər görüləcək.

İstehlakçıların aldadılmasının bir neçə yolu var. Bizim ofisimizdə bir kassa çeki var. Badımcan alan istehlakçıya eqzotik meyvənin qiyməti vurulub. Nəticədə 89 qəpik olmalı olan çekdə 36 manat əks olunub. Əgər şəxs kassa çekinə baxmasa idi, bu fırıldağın da üstü açılmayacaqdı. Bu da hadisə şəhərin mərkəzində yerləşən "Grand market"də baş verib. Yaşadığım evin yaxınlığında bu marketin bir filialı var. Orada təkcə məni, Eyyub Hüseynovu 1 ildə 100 manata qədər aldatmağa cəhd ediblər. Məsələn qabıqlı qoz almışam, ləpənin qiymətini vurublar. Bu hələ mənim gördüyümdür.

Marketlərdə aldatma üsullarından biri də almadığın məhsulun vurulmasıdır. Azad İstehlakçılar Birliyinə gələn bu cür şikayətlərə baxsaq tam əminliklə deyə bilərik ki, Azərbaycan istehlakçıları almadıqları məhsul üçün ildə 500 milyon manat pul ödəyirlər. Ona görə istehlakçılar fəal olmalı, mütləq kassa çeklərinə baxmalı, kartla ödəniş zamanı mütləq şəkildə mobil tətbiqdə bunu yoxlamalı, kassa çekini dərhal atmamalıdır.

Müsahibənin tam versiyası yaxın günlərdə yayımlancaq.