Azərbaycanda 2025-ci il üçün inflyasiya səviyyəsi ilə bağlı müxtəlif beynəlxalq təşkilatlar fgərqli proqnozlar irəli sürür.
Beynəlxalq Valyuta Fondu (IMF) Azərbaycanda 2025-ci il üçün orta illik inflyasiyanı 5,7%, illik inflyasiyanı isə 5,2% səviyyəsində proqnozlaşdırır. Bu proqnoz əsasən, ölkə iqtisadiyyatında müəyyən təzyiqlərin olacağı və inflyasiyanın yüksəlməsi ehtimalını nəzərə alır. Fondun proqnozları əsasən, qlobal iqtisadi şəraitə və regional faktorlara əsaslanır. Çünki beynəlxalq maliyyə qurumları ölkələrin iqtisadi vəziyyətini daha geniş çərçivədə qiymətləndirirlər.
BMT və Dünya Bankı Azərbaycanda inflyasiyanın daha aşağı olacağını proqnozlaşdırır. BMT 2025-ci il üçün inflyasiyanın 3,6%, 2026-cı il üçün isə 3,1% olacağını təxmin edir. Dünya Bankı isə hər iki il üçün inflyasiyanı 2,3% səviyyəsində qiymətləndirir.
Beynəlxalq reytinq agentlikləri, xüsusən də “S&P Global” və “Moody's” Azərbaycanda inflyasiyanın 2025-ci ildə 4%, 2026-cı ildə isə 3% səviyyəsində olacağını gözləyirlər.
Azərbaycan hökumətinin təqdim etdiyi proqnozlar yerli bazarda inflyasiyanın müəyyən dərəcədə tənzimlənəcəyini və dövlətin iqtisadi siyasətlərinin inflyasiya səviyyəsini sabit tutmağa kömək edəcəyini göstərir.
İqtisadiyyat Nazirliyi 2025-ci ildə inflyasiyanın 4,6 faiz olacağını proqnozlaşdırır. Azərbaycan Mərkəzi Bankı isə bu göstəricini 5,5 faiz səviyyəsində təxmin edir. Hər iki qurum ölkə iqtisadiyyatının stabilləşməsini və müəyyən iqtisadi siyasətlərin tətbiqini nəzərə alaraq inflyasiyanın artımının nisbətən mülayim olacağı qənaətinə gəliblər.
Azərbaycanın 2025-ci il üçün inflyasiya proqnozlarının doğruluğu çoxsaylı faktorların qarşılıqlı təsirindən asılıdır. İqtisadi siyasətin effektivliyi, qlobal iqtisadi vəziyyət, yerli istehsalın artması, valyuta bazarının idarə olunması və kənd təsərrüfatı sektorunun inkişafı kimi amillər mühüm təsir faktorlarıdır. Bu səbəbdən, inflyasiyanın səviyyəsi ilə bağlı müxtəlif təşkilatların verdiyi proqnozların doğruluğu yalnız bu amillərin təsir gücündən asılı olacaq.
Qeyd edək ki. 2025-ci ilin yanvar-fevral aylarında Azərbaycanda illik inflyasiya 5,4 faizə yüksəlib.
