ABŞ Prezidenti Donald Trampın yüksək tariflər siyasəti və son bəyanatları beynəlxalq medianın əsas müzakirə mövzularındandır. Tramp Vaşinqtonda keçirilən Respublikaçı Milli Komitəsinin şam yeməyində çıxışı zamanı xarici liderlərin ABŞ-la ticarət sazişi imzalamaq üçün “alçaldıcı addımlar” atdıqlarını qeyd edib. O, danışıqların yalnız onun özü ilə aparılmalı olduğunu bildirib.
Modern.az xəbər verir ki, dünya mətbuatında Tramın qərarı ilə bağlı müzakirələr davam edir.
CNN-in məlumatına görə, Tramp Çin yuanının dəyərdən salınmasını “ədalətsiz oyun” adlandırıb, Pekini manipulyasiyalarda günahlandırıb və bu addımı ABŞ-ın tətbiq etdiyi rüsumlara qarşı kompensasiya cəhdi kimi qiymətləndirib. Tramp “tarif müharibəsi”ni əslində müharibə saymır və xarici liderlərin anlaşma üçün istənilən güzəştə hazır olduqlarını iddia edir.
"The New York Times" yazır ki, ABŞ-ın 9 aprel tarixində qüvvəyə minən yeni tarifləri qlobal bazarlarda qeyri-sabitliyə səbəb olub, dünya indekslərini aşağı salıb. Amerikanın "Dow Jones" və S&P 500 indeksləri artıcıl dördüncü seansı mənfi zonada bağlayıb. Eyni zamanda, Asiya birjalarında da eniş tendensiyası davam edir.
"Reuters" bildirir ki, iqtisadçılar tarif artımlarının qiymət artımına səbəb olacağını, bunun isə ABŞ-da istehlakçılar tərəfindən dərhal hiss olunmayacağını bildirirlər. Çünki may ayının sonuna qədər ölkəyə daxil olan mallar yeni tariflərdən azaddır. ABŞ hələlik danışıqlar üçün qapını bağlamayıb – Tramp hələ də Pekinin güzəştə gedəcəyinə ümid etdiyini deyib.
Tramp administrasiyası yaxın müttəfiqləri olan Cənubi Koreya və Yaponiya ilə ticarət danışıqları planlaşdırır. "The New York Times" qeyd edir ki, Avropa Komissiyası İtaliya baş naziri Corca Meloninin yaxın günlərdə Vaşinqtona səfərinə böyük ümidlər bəsləyir. Bununla belə, Ağ Evdən verilən siqnallar göstərir ki, ABŞ yalnız daxili istehsal və fermerlər üçün sərfəli olan sazişləri qəbul edəcək.
Digər ölkələr isə mümkün razılaşmasız ssenarilərə hazırlaşırlar. "Reuters"in məlumatına görə, Cənubi Koreya avtomobil sektorunu dəstəkləmək üçün təcili maliyyə yardımları, vergi güzəştləri və daxili tələbi stimullaşdıracaq subsidiyalar daxil olmaqla “B planı”nı elan edib. Alternativ bazarların genişləndirilməsi də müzakirə olunur.
"The Washington Post" yazır ki, Trampın siyasəti yalnız investorları deyil, həm də bəzi respublikaçı qanunvericiləri narahat edir. Onlar administrasiyadan tarif strategiyası barədə daha çox şəffaflıq tələb edir, Trampı danışıqlara çağırırlar. Lakin bu təzyiqlər hələlik ciddi addımlara gətirib çıxarmayıb – respublikaçılar Trampın genişmiqyaslı iqtisadi dəyişikliklərini tənqid etməkdən çəkinirlər.
