Çin Xalq Respublikasının Baş Gömrük İdarəsinin məlumatına əsasən, 2025-ci ilin yanvar-mart aylarında Çin və ABŞ arasında ticarət dövriyyəsi ötən ilin eyni dövrü ilə müqayisədə 2,9% artaraq 154,58 milyard ABŞ dollarına çatıb. Bu artım Vaşinqtonun tətbiq etdiyi proteksionist tədbirlərə və Pekinin buna cavab olaraq həyata keçirdiyi simmetrik siyasətə baxmayaraq baş verib.

Modern.az xəbər verir ki, Çin ilk rübdə ABŞ-a ixracını 4,5% artıraraq 115,61 milyard dollara çatdırıb. ABŞ-dan idxal isə 1,4% azalıb və 38,97 milyard dollar təşkil edib. Bunun nəticəsində Çinin müsbət ticarət saldosu 9,1% artaraq 76,64 milyard dollar olub.

Təkcə mart ayında Çin və ABŞ arasında ticarət dövriyyəsi 52,54 milyard dollara çatıb ki, bu da fevralla müqayisədə 28,8% artım deməkdir. Çinin ixracı martda 44,3% artaraq 40,06 milyard dollar olub, ABŞ-dan idxal isə 4% azalaraq 12,48 milyard dollara düşüb.

Çin, ABŞ-dan əsasən soya, pambıq, qarğıdalı, mikroçiplər, yolsuzluq avtomobilləri, koksluq kömür, mis və mis filizi idxal edir. ABŞ isə Çindən smartfonlar, az qiymətli və sadələşdirilmiş gömrük prosedurları ilə daxil olan məhsullar, kompüterlər, litium-ion batareyalar, uşaq oyuncaqları, plastik məhsullar, müşahidə kameraları, məişət texnikası, geyim, ayaqqabı və digər müxtəlif istehlak malları idxal edir.

Ticarət əlaqələri Vaşinqtonun tətbiq etdiyi proteksionist rüsumlar və Çin tərəfindən görülən qarşılıqlı tədbirlər səbəbilə müəyyən təzyiqlərlə üzləşsə də, ümumi dövriyyə müsbət dinamika nümayiş etdirib. Qeyd edək ki, ötən həftə tərəflər qarşılıqlı gömrük rüsumlarını 125%-ə qədər artırıblar.

Xatırladaq ki, 2023-cü ildə iki ölkə arasındakı ticarət dövriyyəsi 11,6% azalaraq 664,45 milyard dollar təşkil etmişdi. 2024-cü ildə isə bu rəqəm 3,7% artaraq 688,28 milyard dollara çatıb.