Azərbaycanın müxtəlif bölgələrində yaz fəslinə xas olmayan soyuq və yağıntılı hava şəraiti müşahidə olunur. Milli Hidrometeorologiya Xidmətinin verdiyi məlumata görə, bu gün və yaxın günlərdə ölkənin rayonlarında arabir leysan xarakterli yağış, şimşək və dolu hadisələri gözlənilir. Dağlıq ərazilərdə isə qar yağması ehtimal edilir. Havanın bu cür keçməsi kənd təsərrüfatı üçün müəyyən təhlükələr yaradır.

Mütəxəssislər bildirirlər ki, belə hava şəraiti xüsusilə meyvə bağları və taxıl sahələri üçün risklidir. Yaz aylarında çiçəkləmə mərhələsində olan meyvə ağacları üçün soyuq gecələr məhsuldarlığın azalmasına səbəb ola bilər. Dolu hadisələri isə gənc ağaclara və açıq sahədə yetişdirilən tərəvəzlərə ciddi ziyan vura bilər.

Liberal İqtisadçılar Mərkəzi sədri, iqtisadçı ekspert Akif Nəsirli də Modern.az-a deyib ki, yağışlı havalar bağlara mənfi təsir göstərir:

“Hazırda çiçəkdə olan meyvə ağaclarımız var. Kütləvi çiçəklənmə aran rayonlarında və daha soyuq qurşaq olan şimal rayonlarımızda da müşahidə olunur. Çiçək açır və tozlanma prosesi gedir. Bu proses zamanı əgər çiçəyin üzərinə bir damcı yağış düşürsə, həmin çiçəyin tozlanma prosesi pozulur. Ya ümumiyyətlə meyvə əmələ gəlmir, ya da qüsurlu meyvələr əmələ gəlir. Bu baxımdan hazırda yağışlı hava şəraiti ölkədə meyvə bağlarına mənfi təsir göstərir. Məsələ burasındadır ki, yağışlı günlərin sayı az olacaqsa, bu məhsuldarlığa o qədər də ciddi təsir etməyəcək. Çünki bütün ağaclardakı çiçəklər eyni vaxtda çiçəkləmir. Məsələn gilas ağacı 10 gün ərzində müxtəlif vaxtlarda çiçəklərin açılmasını təmin edir. Yağışlı günlərin sayı nə qədər çox olacaqsa, meyvə bağlarında məhsuldarlığa o qədər çox təsir edəcək”.

Eyni zamanda, yağıntıların intensiv olması torpaqda suyun çoxalmasına, bəzi yerlərdə isə su basqınlarına səbəb ola bilər ki, bu da taxıl və kartof sahələrində çürümə riskini artırır. Hazırkı hava şəraiti həmçinin kənd təsərrüfatı texnikalarının sahəyə girişini çətinləşdirə bilər, bu isə bəzi əkin və qulluq işlərinin gecikməsinə səbəb ola bilər.

Ekspert bildirib ki, ölkənin Aran rayonlarında yonca sahələrinin birinci biçini aprelin ikinci on günlüyündə başlanır:

“Yonca artıq biçinə hazırdır, əgər külək və yağış birlikdə müşahidə olunarsa, bu otun yatmasına səbəb olar. Otlar yatan zaman bitkilər çoxalır. Taxıl zəmilərində artıq gövdə sünbül tutub, yuxarı hissə bərkiyib. Yaz alarında taxılın suya tələbatı artır. Fermerlər də bunu nəzərə alaraq sahələri sulayır. Əgər sahələr sulanandan sonra külək əsir, yağış yağırsa, bu sünbüllərin də aşmasına səbəb olur. Bu da biçin zamanı itkilərə səbəb olur. Biçinə qədər sünbülün havalanma sistemi pozulur, bu  da onun yetişməsinə maneə törədir. Yəni yağışlı hava şəraiti bu sahələrə də mənfi təsir edir. Yalnız toxumdan əkilən bitkilər ki, var onlar üçün belə hava şəraiti hələki münbitdir. Digər tərəfdə havanın temperatunun soyuması, bitkilərin yerüstü inkişafını bir qədər ləngidir. Bu da məhsulun bazara bir qədər gec çıxmasına gətirib çıxarır”.

Mütəxəssislər pis hava şəraitinin yaratdığı təsirlərin bazarda qiymətlərə də təsir edəcəyini istisna etmir.