Ötən həftə Bakıda müşahidə olunan güclü yağış və küləkli hava şəraiti şəhərdə bir sıra problemlərə səbəb olub. Pis hava şəraiti ictimai nəqliyyatda gecikmələrə yol açdığı üçün vətəndaşların əksəriyyəti taksi xidmətlərinə üz tutub. Artan tələbat fonunda bəzi taksi şirkətləri və sürücülər qiymətləri süni şəkildə dəfələrlə artırıblar.

Şikayətçilərin sözlərinə görə, bəzi marşrutlarda adi vaxtlarda 3-4 manat olan gediş haqqı 15-20 manata qədər yüksəlib. Sosial şəbəkələrdə paylaşılan görüntülərdə bəzi hallarda qiymətlərin 5-6 dəfə artdığı əksini tapıb.

Sakinlər bu vəziyyəti sui-istifadə və məsuliyyətsizlik kimi qiymətləndirirlər. Paytaxt sakinləri hər dəfə hava pisləşəndə bu problemi yenidən yaşamaq riski ilə üz-üzədirlər.

Modern.az-a açıqlamasında iqtisad elmləri doktoru, Milli Məclisin sabiq deputatı Rüfət Quliyev bildirib ki, qiymətlər tələb-təklif qanuna görə müəyyənləşir:

“Qanun tərəfindən taksilərin süni şəkildə qiyməti qaldırması ilə bağlı heç bir məhdudiyyət yoxdur. Hazırda bazar iqtisadiyyatıdır, yəni qiymət tələb-təklifə görə müəyyənləşir. Burada taksi sürücüsünü də başa düşmək lazımdır. O da fırtınada, yağışda, küləkdə böyük risk edib şəhərdə maşın sürməyə çıxır. Amma bu məsələ “bayramqabağı bazarda niyə qiymət artır, niyə belə olur?” sualı ilə eynidir. Yəni bazar iqtisadiyyatdıdır. Bazar iqtisadiyyatının ən aparıcı qanunu tələb-təklif qanunudur”.

R.Quliyev vurğulayıb ki, dövlət bunun qarşısını ala bilməz: “Dövlət buna qarşı nə etsin? Məhdudiyyət qoyacaqsan, düz alınmayacaq. Bir vaxtda deyirdilər ki, restoranlarda qiymətlərin artmaması üçün müəyyən məhdudiyyətlər tətbiq edilsin. Düzgün deyil bu, qeyri-mümkündür, bazar iqtisadiyyatında nə qədər çox restoran olsa, bir o qədər rəqabət olacaq və qiymətlər düz olacaq. Rəqabət olmalıdır. Taksi də belə. Bunun qarşısını sovet vaxtı almışdılar, sonu nə oldu gördük. İctimai nəqliyyat dövlətin nəzarətində olduğu üçün burada qiyməti süni şəkildə artıra bilməzlər. Lakin taksi şəxsi biznesdir”.

Azad İstehlakçılar Birliyinin sədri Eyyub Hüseynov söyləyib ki, qanun taksilərə hava şəratinə uyğun istədikləri qiyməti qoymağa imkan verir:

“Yəni qanunvericilikdə bu məsələ fiksə olunmayıb. Taksi şirkətləri müstəqil qurumlardır və vergi verirlər. Taksinin qiymətinin artması ilə bağlı bu günlərdə “Azad İstehlakçılar Birliyi”nə çoxsaylı istehlakçı zəngləri daxil olub. Lakin hökumət elə bir effektiv iş aparmalıdır ki, qiymətin qalxması bazar qanunlarına uyğun olaraq sabit olsun və qalxmasın. Yəni ictimai nəqliyyat elə işləməlidir ki, taksilər qiyməti qaldırmasınlar. Fiksə olunmuş qiymət yoxdur”.

E.Hüseynov Azərbaycanda taksilərdə taksometrlərin olmamasının ən çatışmayan cəhət olduğunu deyib:

“Ən ciddi məsələ budur. Hökumət bu məsələlərin qaydaya düşməsini istəyirsə, buyursunlar taksometr qoysunlar. Digər hava şəraitində də taksilər istədikləri kimi hərəkət edirlər. Onlayn sifarişlə gələn taksilərin müştəriləri lazımi olmayan ünvana aparırlar. Biz bura qədər gətirmişik. Bu sahədə ciddi narazılıq var. Düşünürəm ki, bu sahə düzəlməlidir”.